រុស្ស៊ី បានបាញ់គ្រាប់ផ្លោង និងគ្រាប់រ៉ូកែតចន្លោះពី ១.៥០០គ្រាប់ ទៅ ២.៥០០គ្រាប់ នៅតំបន់ ដូណិតស្ក៍ (Donetsk) ដែលត្រូវបានបំផ្លិចបំផ្លាញដោយសង្រ្គាមរបស់អ៊ុយក្រែន ជារៀងរាល់ថ្ងៃ ហើយកំពុងកំណត់គោលដៅលើហេដ្ឋារចនាសម្ព័ន្ធសំខាន់ៗដែលធ្វើឱ្យប្រជាជនកាន់តែពិបាកក្នុងការរស់នៅទីនោះក្នុងរដូវរងារ។

ខេត្តភាគខាងកើត ដែលទឹកដី ៥៧ភាគរយ កាន់កាប់ដោយរុស្ស៊ីនេះ បានស្ថិតនៅលើសមរភូមិមុខនៃសង្រ្គាមចាប់តាំងពីឆ្នាំ២០១៤ មក នៅពេលដែលក្រុមបរយុទ្ធគាំទ្រដោយរុស្ស៊ី បានដណ្តើមយកទីក្រុងរដ្ឋធានីនៃតំបន់ដែលត្រូវបានគេហៅថា ដូណិតស្ក៍ ក៏ដូចជាទីក្រុងធំៗជាច្រើនទៀត។

ចាប់តាំងពីរុស្ស៊ី បានចាប់ផ្តើមការលុកលុយទ្រង់ទ្រាយធំក្នុងឆ្នាំ២០២២ ក្នុងអ៊ុយក្រែនមក ខេត្តនោះជាទីតាំងដែលការប្រយុទ្ធដ៏កាចសាហាវ និងអូសបន្លាយបំផុតរបស់សង្រ្គាមបានកើតឡើង។

អភិបាលខេត្តបាននិយាយថា រោងចក្រថាមពល គូរ៉ាខូវ (Kurakhove) ដែលជាប្រភពថាមពលអគ្គិសនីទ្រង់ទ្រាយធំមួយនៅសេសសល់ក្នុងតំបន់នោះ ត្រូវបានបង្ខំឱ្យបិទកាលពីមួយសប្តាហ៍មុនដោយសារតែការបាញ់ផ្លោងរបស់រុស្ស៊ី ហើយនេះគឺជាផ្នែកមួយនៃយុទ្ធនាការកាន់តែទូលំទូលាយ៕