ជនប៉ាឡេស្ទីនជម្លៀសខ្លួននៅទីក្រុង Rafah បានចំណាយពេលរាប់ម៉ោងជីកប្រឡាយ និងដាក់បំពង់ទឹក ដោយសង្ឃឹមថានឹងអាចតទឹកស្អាត់ទៅកាន់ជំរំបណ្តោះអាសន្នរបស់ពួកគេ ចេញពីប្រទេសអេហ្ស៊ីប ដូចដែលពួកគេធ្លាប់បានផ្តល់ជូន មុនពេលផ្ទុះសង្រ្គាម ។

ក្រុមស្ម័គ្រចិត្តនាំគ្នាដើរប្រមូលប្រាក់ពីអ្នកដែលអាចលៃលកឲ្យបាន ហើយនាំគ្នាជីកប្រឡាយតាមគ្រប់ច្រកក្នុងជំរំជនភៀសខ្លួនស្របពេលដែលពួកគេរៀបរាប់ពីកង្វះខាតទឹកធ្ងន់ធ្ងរ ។

លោក Ahmed Sorour គឺជាអ្នកជម្លៀសខ្លួនមួយរូបនិយាយថា បើសិនជាខ្ញុំទទួលបានទឹក ១ដប ខ្ញុំហូបតែមួយក្អឹកប៉ុណ្ណោះ រួចទុកសម្រាប់កូនៗរបស់ខ្ញុំ ។

លោកបន្តថា លោកមានការព្រួយបារម្ភថា នៅថ្ងៃស្អែក ឬនៅយប់នេះ ពួកយើងនឹងគ្មានទឹកនោះទេ ឬកូនប្រុសរបស់ខ្ញុំស្រេកទឹក ហើយពួកយើងគ្មានទឹកសម្រាប់កូនប្រុសរបស់ពួកយើង ។

គួរឲ្យដឹងថា ក្រសួងសុខាភិបាលដែលគ្រប់គ្រងដោយក្រុមហាម៉ាស់ បាននិយាយកាលពីថ្ងៃអង្គារថា ចំនួនអ្នកស្លាប់របស់ជនប៉ាឡេស្ទីន នៅតំបន់ហ្គាហ្សាស្ទ្រីប ពីការវាយប្រហាររបស់អ៊ីស្រាអែល បានកើនឡើងដល់ ២៧.៥៨៥ នាក់ និងមនុស្ស ៦៦.៩៧៨ នាក់ផ្សេងទៀត បានរងរបួស។ 

ក្រសួងមួយនេះបាននិយាយនៅក្នុងសេចក្តីថ្លែងការណ៍ថា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីន ១០៧ នាក់ និងបង្ករបួស ១៤៣ នាក់ផ្សេងទៀតក្នុងរយៈពេល ២៤ ម៉ោងកន្លងមកនេះ ។

ពួកគេបន្តថា ជនរងគ្រោះមួយចំនួននៅតែស្ថិតនៅក្រោមគំនរបាក់បែក ដោយសារតែមានការទម្លាក់គ្រាប់បែកយ៉ាងធ្ងន់ធ្ងរ ព្រមទាំងខ្វះអ្នកការពារជនស៊ីវិល និងរថយន្តគិលានសង្គ្រោះ ៕