នៅក្នុងឯកសារយោងជាក់ស្តែង សម្រាប់ការស្វែងរកដំណោះស្រាយការទូត ដើម្បីបញ្ចប់ការវាយប្រហាររបស់ក្រុមឧទ្ទាមហ៊ួទីលើនាវានានា នៅក្នុងសមុទ្រពណ៌ក្រហម បេសកជនពិសេសរបស់សហរដ្ឋអាមេរិកប្រចាំប្រទេសយេម៉ែន ក្នុងខ្សែអាត់វីដេអូដែលបានចេញផ្សាយកាលពីថ្ងៃអង្គារ (ទី៦ ខែកុម្ភៈ) បានប្រាប់ឲ្យដឹងថា កិច្ចប្រឹងប្រែងការទូតកំពុងដំណើរការទៅ ដើម្បីព្យាយាមស្វែងរក «ការដូរចិត្ត» សម្រាប់ក្រុមរបស់យេម៉ែននេះ។

បេសកជនពិសេសរបស់សហរដ្ឋអាមេរិកលោក Tim Lenderking បានថតទុកការអត្ថាធិប្បាយរបស់លោក កាលពីថ្ងៃសុក្រ (ទី២ ខែកុម្ភៈ) សម្រាប់សន្និសីទនៅវិទ្យាស្ថានស្រាវជ្រាវ មុនពេលហោះហើរទៅកាន់ប្រទេសអូម៉ង់ ដើម្បីពិភាក្សាអំពីវិបត្តិដែលបានបង្កឲ្យមានការវាយប្រហារសងសឹករបស់សហរដ្ឋអាមេរិក និងអង់គ្លេសលើទីតាំងអាវុធរបស់ក្រុមហ៊ួទី។

អូម៉ង់គឺជាអ្នកសម្រុះសម្រួលជាមួយក្រុមដែលមានសម្ព័ន្ធមិត្តអ៊ីរ៉ង់ គឺក្រុមហ៊ួទីដែលបានគ្រប់គ្រងលើរដ្ឋធានីសាណា និងតំបន់នានាដែលមានប្រជាជនច្រើនបំផុតរបស់យេម៉ែន នៅក្នុងសង្គ្រាមស៊ីវិលដែលបានថមថយហើយ ទោះបីជាបទឈប់បាញ់ឆ្នាំ២០២២ ផុតកំណត់ហើយក្ដី។

គួរបញ្ជាក់ថា ក្រុមហ៊ួទីនិយាយថា ពួកគេកំពុងធ្វើសកម្មភាពក្នុងសាមគ្គីភាពជាមួយប៉ាឡេស្ទីន នៅតំបន់ហ្កាហ្សា ហើយមេដឹកនាំរបស់ក្រុមសកម្មប្រយុទ្ធនេះ កាលពីថ្ងៃអង្គារ បានប្តេជ្ញាថា នឹងបង្កើនការវាយប្រហារដោយមីស៊ីល និងយានដ្រូនបន្ថែមទៀត ប្រសិនបើអ៊ីស្រាអែលមិនបញ្ឈប់ប្រតិបត្តិការរបស់ខ្លួនប្រឆាំងនឹងក្រុមហាម៉ាសអ៊ីស្លាមនិយមដែលកំពុងកាន់អំណាច នៅដែនដីនេះទេនោះ។

លោក Lenderking បាននិយាយថា កិច្ចប្រឹងប្រែងការទូត «កំពុងត្រូវបានធ្វើឡើង ដើម្បីព្យាយាម និងស្វែងរកការដូរចិត្ត សម្រាប់ក្រុមហ៊ួទី ដែលអាចធ្វើឲ្យស្ថានការណ៍ប្រសើរឡើង និងដើម្បីងាកចេញពីទិដ្ឋភាពប្រែប្រួលនៃវិបត្តិសមុទ្រក្រហម៕