រុស្ស៊ី បានបើកការវាយប្រហារដោយមីស៊ីលទៅលើទីក្រុងគីវ និងទីក្រុងផ្សេងទៀតរបស់អ៊ុយក្រែន នៅព្រឹកថ្ងៃពុធនេះ ដោយបានសម្លាប់មនុស្សម្នាក់នៅភាគខាងត្បូង និងបណ្តាលឲ្យប្រព័ន្ធការពារដែនអាកាសស្ទាក់ចាប់គ្រាប់នៅក្នុងរដ្ឋធានី ជាកន្លែងមានការផ្ទុះជាច្រើនត្រូវបានលាន់ឮ។ សារព័ត៌មាន Kyiv Post បានរាយការណ៍ថា ការផ្ទុះខ្លាំងៗចំនួនពីរលើក ត្រូវបានលាន់ឮនៅកណ្តាលទីក្រុងនៅម៉ោងប្រហែល ៧ ព្រឹក ដោយយ៉ាងហោចណាស់ការផ្ទុះលើកទីពីរមានរយៈពេល៤៥នាទីក្រោយលើកទី១ បានផ្ទុះ។ អ្នកសារព័ត៌មានម្នាក់ បានឮសំឡេងប្រព័ន្ធការពារដែនអាកាស ស្ទាក់ចាប់មីស៊ីលជាច្រើនគ្រាប់ ហើយបានឃើញការផ្ទុះ១គ្រាប់នៅលើអាកាស។ អភិបាលក្រុងគីវ លោក វីតាលី ក្លីតឆ្កូ(Vitali Klitschko) បាននិយាយថា ប្រព័ន្ធការពារដែនអាកាសបានស្ទាក់ចាប់ និងជំរុញឱ្យប្រជាជនស្នាក់នៅក្នុងទីជម្រករបស់ពួកគេ។ លោក Klitschko បាននិយាយថា ខ្សែបណ្តាញចរន្តខ្ពស់ចំនួនពីរនៅក្នុងរដ្ឋធានី ត្រូវបានបំផ្លាញដោយបំណែកគ្រាប់រ៉ុក្កែត ដោយបានផ្តាច់ចរន្តអគ្គិសនីនៅតំបន់មួយចំនួន។ អភិបាលក្រុង មីកូឡាយ(Mykolaiv) លោក អូឡេកសានឌ័រ សេនកេវិច(Oleksandr Sienkevych) បាននិយាយថា ការវាយប្រហារដោយមីស៊ីលមួយគ្រាប់ នៅភាគខាងត្បូងទីក្រុង Mykolaiv បានសម្លាប់មនុស្សម្នាក់ និងបានបំផ្លាញអគារលំនៅឋានយ៉ាងហោចណាស់២០ខ្នង និងមានអ្នករងរបួសមួយចំនួនត្រូវបានរាយការណ៍។ អគារលំនៅឋានជាច្រើនខ្នងត្រូវបានបំផ្លាញ ដែលក្នុងចំណោមនេះប្រហែល ២០ខ្នង បានបាក់ដំបូល និងបំផ្លាញដល់បណ្តាញផ្គត់ផ្គង់ឧស្ម័ន និងទឹក។ 

នៅក្នុងប្រទេសអ៊ុយក្រែនទាំងមូល បានស្ថិតនៅក្រោមការប្រកាសអាសន្នអំពីការវាយឆ្មក់តាមអាកាសចាប់ពីម៉ោងប្រហែល ៦ព្រឹក នៅថ្ងៃពុធនេះ ដោយមានការព្រមានរបស់កងទ័ពអាកាសអ៊ុយក្រែន នៅលើ បណ្តាញ Telegram អំពីហានិភ័យនៃការវាយប្រហារដោយមីស៊ីលរបស់រុស្ស៊ី។