ក្រុមហាម៉ាសបានស្នើផែនការបទឈប់បាញ់ ដែលនឹងធ្វើឲ្យស្នូរកាំភ្លើងនៅហ្កាហ្សាស្ងាត់រយៈពេល ៤ខែកន្លះខែ ពោលគឺដែលអាចនាំរកការបញ្ចប់សង្រ្គាមតែម្ដង ក្នុងការឆ្លើយតបទៅនឹងសំណើដែលបានផ្ញើឲ្យ កាលពីសប្តាហ៍មុន ពីអ្នកសម្របសម្រួលកាតា និងអេហ្ស៊ីប និងដែលត្រូវបានគាំទ្រដោយសហរដ្ឋអាមេរិក និងអ៊ីស្រាអែល។

យោងតាមឯកសារព្រាងដែលសារព័ត៌មាន Reuters បានឃើញនោះ បានបង្ហាញថា សំណើតបរបស់ក្រុមហាម៉ាសនេះ បានគូសវាសរូបភាពជា ៣ដំណាក់កាល ដែលនីមួយៗមានរយៈពេល ៤៥ថ្ងៃ។ សំណើនេះនឹងឃើញក្រុមសកម្មប្រយុទ្ធដោះដូរចំណាប់ថ្នូរអ៊ីស្រាអែលនៅសល់ ដែលពួកគេបានចាប់ កាលពីថ្ងៃទី៧ ខែតុលា ជាមួយអ្នកទោសប៉ាឡេស្ទីន។ ការកសាងតំបន់ហ្កាហ្សាឡើងវិញ នឹងចាប់ផ្តើម កងកម្លាំងអ៊ីស្រាអែលនឹងដកចេញទាំងស្រុង ហើយសាកសព និងអដ្ឋិធាតុនឹងត្រូវបានប្រគល់ឲ្យគ្នាទៅវិញទៅមក។

រដ្ឋមន្ត្រីការបរទេសអាមេរិកលោក Antony Blinken បានទៅដល់ប្រទេសអ៊ីស្រាអែលហើយ ពោលគឺមួយយប់បន្ទាប់ពីបានជួបជាមួយមេដឹកនាំនៃអ្នកសម្រុះសម្រួលកាតា និងអេហ្ស៊ីប ក្នុងកិច្ចប្រឹងប្រែងជំរុញការទូតយ៉ាងខ្លាំងក្លាបំផុតនៃសង្រ្គាមដែលមានរហូតមកដល់ពេលនេះ ក្នុងគោលបំណងឲ្យបានឈានដល់ការពន្យារបទឈប់បាញ់។ ព័ត៌មានលម្អិតនៃការស្នើតបរបស់ក្រុមហាម៉ាសនេះ មិនត្រូវបានរាយការណ៍ឲ្យដឹងនៅមុននេះទេ។

យោងតាមសំណើតបរបស់ក្រុមហាម៉ាសនេះ រាល់ចំណាប់ថ្នូរស្ត្រីជនជាតិអ៊ីស្រាអែលទាំងអស់ បុរសអាយុក្រោម ១៩ឆ្នាំ មនុស្សចាស់ និងអ្នកមានជំងឺ នឹងត្រូវបានដោះលែងក្នុងអំឡុង ៤៥ថ្ងៃដំបូង ជាថ្នូរនឹងការដោះលែងស្ត្រី និងកុមារប៉ាឡេស្ទីនពីពន្ធនាគាររបស់អ៊ីស្រាអែល។ ចំណាប់ថ្នូរជាបុរស ដែលនៅសេសសល់ នឹងត្រូវដោះលែងក្នុងដំណាក់កាលទី២ ហើយនៅតែមានការដោះដូរទៀត ក្នុងដំណាក់កាលទី៣។ នៅចុងបញ្ចប់នៃដំណាក់កាលទី៣ ក្រុមហាម៉ាសនឹងរំពឹងថា ភាគីទាំង២ នឹងឈានដល់កិច្ចព្រមព្រៀងមួយស្តីពីការបញ្ចប់សង្គ្រាមទាំងស្រុងតែម្ដង៕