គណៈកម្មការអឺរ៉ុប នៅថ្ងៃពុធ (ទី៧ ខែកុម្ភៈ) នេះ បាននិយាយថា ច្បាប់ថ្មីរបស់ប្រទេសហុងគ្រី ស្តីពី «ការការពារអធិបតេយ្យភាពជាតិ» ដែលគណបក្សកាន់អំណាច Fidesz បានលើកឡើងថា ជាការចាំបាច់ ដើម្បីការពារប្រឆាំងនឹងការជ្រៀតជ្រែកផ្នែកនយោបាយពីបរទេសនោះ បំពានច្បាប់របស់សហភាពអឺរ៉ុប (EU)។

គណៈកម្មការបានប្រាប់ឲ្យដឹងថា ខ្លួនបានផ្ញើការជូនដំណឹងជាផ្លូវការដល់ប្រទេសហុងគ្រីថា ខ្លួននឹងបើកដំណើរការនីតិវិធីរំលោភបំពាន ពាក់ព័ន្ធនឹងច្បាប់ ដែលទទួលបានការអនុម័តកាលពីខែធ្នូ ដោយបាននិយាយថា បានរំលោភលើតម្លៃប្រជាធិបតេយ្យ និងសិទ្ធិជាមូលដ្ឋានរបស់សហភាព។

គណៈកម្មការបាននិយាយថា ច្បាប់របស់ហុងគ្រីបំពានច្បាប់របស់ EU ស្តីពីលទ្ធិប្រជាធិបតេយ្យ និងសិទ្ធិស្មើគ្នារបស់ពលរដ្ឋ EU ច្បាប់ការពារទិន្នន័យ និងច្បាប់មួយចំនួនដែលអនុវត្តចំពោះទីផ្សារផ្ទៃក្នុង។

សូមបញ្ជាក់ថា ច្បាប់នេះបានកើតឡើងនៅពេលដែលនាយករដ្ឋមន្រ្តីជាតិនិយមលោក Viktor Orban ដែលបានប៉ះទង្គិចម្តងហើយម្តងទៀតជាមួយ EU អំពីសិទ្ធិប្រជាធិបតេយ្យ នៅក្នុងប្រទេសហុងគ្រី បានបង្កើនយុទ្ធនាការរបស់គណបក្សរបស់លោក នៅមុនការបោះឆ្នោតសភាអឺរ៉ុប នៅខែមិថុនាខាងមុខ៕