ការវាយប្រហារបានធ្លាក់នៅជិតច្រកចូលជំរំតង់មួយកន្លែងក្នុងទីក្រុង Rafah នៃតំបន់ហ្កាហ្សា កាលពីថ្ងៃពុធ បង្កឱ្យមានការភ័យខ្លាចក្នុងចំណោមប្រជាជនប៉ាឡេស្ទីនដែលបានភៀសខ្លួននៅទីនោះ។

វីដេអូដែលថតដោយសារព័ត៌មាន Reuters បានបង្ហាញពីប្រជាជនប៉ាឡេស្ទីនដែលមានទុក្ខព្រួយ កំពុងរត់ក្នុងភាពភ័យខ្លាច បន្ទាប់ពីឧបទ្ទវហេតុ ដែលបានបណ្តាលឱ្យរថយន្តមួយគ្រឿងរងការបំផ្លាញនៅខាងក្រៅជំរុំ។

លោក អាប់ដែលហាគីម អាវាត(Abdelhakim Awad) ជនភៀសខ្លួនប៉ាឡេស្ទីន បានប្រាប់សារព័ត៌មានរ៉យទ័រថា គ្រាប់រ៉ុក្កែតបានធ្លាក់ខណៈលោកនិងមិត្តភ័ក្តិមួយក្រុម កំពុងលេងកម្សាន្តជាមួយក្មេងៗនៅក្នុងជំរំ។

ពាក់កណ្តាលនៃប្រជាជនតំបន់ហ្កាហ្សា ២,៣ លាននាក់ កំពុងជ្រកកោននៅក្នុងទីក្រុង Rafah នៅភាគខាងត្បូងតំបន់ហ៊ុមព័ទ្ធនោះ។

ជាមួយគ្នានេះ ក្រុមមន្ត្រី បាននិយាយថា កងកម្លាំងអ៊ីស្រាអែល បានសម្លាប់ពលរដ្ឋប៉ាឡេស្ទីនបីនាក់ អំឡុងការវាយឆ្មក់លើជំរំជនភៀសខ្លួននៅតំបន់គ្រប់គ្រង West Bank កាលពីថ្ងៃពុធ ខណៈអ្នកការទូតជាន់ខ្ពស់របស់សហរដ្ឋអាមេរិក លោក Antony Blinken បានបញ្ជាក់លើតម្រូវការក្នុងការបន្ថយភាពតានតឹងក្នុងអំឡុងពេលទស្សនកិច្ចទៅកាន់តំបន់នេះ។

យោធាអ៊ីស្រាអែល និយាយថា ខ្លួនបានសម្លាប់ជនសង្ស័យដែលតាមចាប់ខ្លួន នៅក្នុងការបាញ់ប្រហារតគ្នាមួយ បន្ទាប់ពីឡោមព័ទ្ធលំនៅឋានដែលជននេះស្នាក់នៅ។ យោធា និយាយថា អ្នកប្រយុទ្ធប្រដាប់អាវុធពីរនាក់ផ្សេងទៀត ដែលព្យាយាមរត់គេចពីលំនៅឋានក៏ត្រូវបានសម្លាប់នៅក្នុងប្រតិបត្តិការដែលមានរយៈពេល ៤ ម៉ោង ។