ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្ដ្រី និង​ជាប្រ​ធាន​គណៈកម្មាធិការ​ជាតិ​សន្ដិសុខ​អាកាសចរណ៍ស៊ីវិលកម្ពុជា នៅព្រឹកថ្ងៃទី៨ ខែកុម្ភៈ ឆ្នាំ២០២៤នេះ នៅទីស្តីការ​គណៈ​រដ្ឋ​មន្រ្តី បានដឹកនាំកិច្ចប្រជុំផ្សព្វផ្សាយអនុក្រឹត្យស្ដីពី ការគ្រប់គ្រង​សន្ដិសុខ​អាកាសចរណ៍​ស៊ីវិល​កម្ពុជា។

សូមបញ្ជាក់ថា កាលពីថ្ងៃទី១២ ខែមករា ឆ្នាំ២០២៤កន្លងទៅ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានចេញ​អនុក្រឹត្យ​ស្ដីពី​ការ​គ្រប់​គ្រង​សន្ដិសុខ​អាកាសចរណ៍​ស៊ីវិល​កម្ពុជា ខណៈអនុក្រឹត្យនេះ មាន១២ជំពូក និង២៥មាត្រា។

យោង​តាមអនុក្រឹត្យនេះគឺកំណត់អំពីការគ្រប់គ្រងសន្តិសុខអាកាសចរណ៍ស៊ីវិល នៅក្នុងកម្ពុជា ក្នុង​គោល​បំណងដើម្បីលើកកម្ពស់ប្រសិទ្ធភាពនៃអាកាសចរណ៍ស៊ីវិល ការពារសន្តិសុខ និង​សុវត្ថិភាព​ដល់អ្នកដំណើរ ក្រុមអាកាសយានិក បុគ្គលិកបម្រើការងារលើផ្ទៃដី សាធារណជនទូទៅ អាកាសយាន អាកាសយានដ្ឋានអន្តរជាតិ អាកាសយានដ្ឋានមូលដ្ឋាន និងឋបនីយភណ្ឌ​អាកាស​យានដ្ឋាន ព្រមទាំងប្រឆាំង នឹង​អំពើ​រំលោភ​បំពាន​ច្បាប់​នៅ​លើ​ផ្ទៃ​ដី​ដែល​ពាក់ព័ន្ធ​ជាមួយ​នឹង​សកម្មភាព​អាកាសចរណ៍ស៊ីវិល និងពេលកំពុងហោះហើរជាដើម។

គណៈកម្មាធិការជាតិសន្ដិសុខអាកាសចរណ៍ស៊ីវិលកម្ពុជា មានឧបនាយករដ្ឋមន្ដ្រី នេត សាវឿន ជាប្រធាន និងអនុប្រធានប្រចាំការ ១រូប, អនុប្រធាន១១រូប និងសមាជិកជាច្រើនរូបផ្សេងទៀត។ គណៈកម្មាធិការជាតិនេះ ត្រូវធ្វើជាសេនាធិការឲ្យរាជរដ្ឋាភិបាល លើការដឹកនាំ និងគ្រប់​គ្រង​ការងារ​សន្ដិសុខអាកាសចរណ៍ស៊ីវិលនៅកម្ពុជា៕