អគ្គលេខាធិការអង្គការសហប្រជាជាតិ លោក Antonio Guterres បានព្រមានកាលពីថ្ងៃពុធថា ពិភពលោកកំពុងឈានចូលដល់ «សម័យកាលនៃភាពវឹកវរ» ដោយក្រុមប្រឹក្សាសន្តិសុខដែលបែងចែកគ្នាយ៉ាងជ្រៅ ពុំអាចដោះស្រាយបញ្ហាធំៗបាន ដូចជាសង្គ្រាមអ៊ីស្រាអែល និងក្រុមហាម៉ាសជាដើម។ ដោយសង្គ្រាមនៅតំបន់ហ្កាហ្សា ឈានចូលដល់ខែទី៥របស់ខ្លួនកាលពីថ្ងៃពុធ លោក Guterres បានព្រមានថា ប្រសិនបើកងកម្លាំងប្រដាប់អាវុធអ៊ីស្រាអែល បន្តដាក់សម្ពាធចូលទៅក្នុងទីក្រុង Rafah ភាគខាងត្បូងនោះវានឹងបង្កើននូវអ្វីដែលជាសុបិន្តអាក្រក់មនុស្សធម៌រួចទៅហើយ ជាមួយនឹងផលវិបាកនៅក្នុងតំបន់ដែលពុំអាចនិយាយបាន។

កងកម្លាំងអ៊ីស្រាអែល នៅក្នុងយុទ្ធនាការរបស់ពួកគេដើម្បីកម្ទេចក្រុមហាម៉ាស បន្ទាប់ពីការវាយប្រហារដែលមិនធ្លាប់មានពីមុនមក កាលពីថ្ងៃទី ៧ ខែតុលា បានទម្លាក់គ្រាប់បែកឥតឈប់ឈរទៅលើតំបន់ហ្កាហ្សា និងបានធ្វើការវាយលុកតាមជើងគោក ដោយបានបណ្តាលឲ្យប្រជាជនជាងមួយលាននាក់ភៀសខ្លួនទៅភាគខាងត្បូង។ លោក Guterres និយាយក្នុងអំឡុងពេលសុន្ទរកថាទៅកាន់មហាសន្និបាតដែលបង្ហាញពីអាទិភាពឆ្នាំ ២០២៤ របស់លោកថា វាដល់ពេលហើយសម្រាប់បទឈប់បាញ់មនុស្សធម៌បន្ទាន់ និងការដោះលែងចំណាប់ថ្នូរទាំងអស់ដោយគ្មានលក្ខខណ្ឌ។

នៅក្នុងសុន្ទរកថា លោកបានអំពាវនាវឱ្យមានការផ្លាស់ប្តូរក្រុមប្រឹក្សាសន្តិសុខ និងប្រព័ន្ធហិរញ្ញវត្ថុអន្តរជាតិ ក្នុងចំណោមកំណែទម្រង់ផ្សេងៗទៀត។ នេះមិនមែនជាលើកដំបូងនោះទេ ដែលក្រុមប្រឹក្សាត្រូវបានបែងចែក ប៉ុន្តែវាជារឿងអាក្រក់បំផុត។ ភាពជាប់គាំង នាពេលបច្ចុប្បន្ននេះមានស្ថានភាពកាន់តែជ្រៅ និងកាន់តែគ្រោះថ្នាក់។ លោកនិយាយថា មិនដូចក្នុងអំឡុងពេលសង្រ្គាមត្រជាក់នោះទេ នៅពេលដែលយន្តការដែលបានបង្កើតឡើងយ៉ាងល្អ បានជួយគ្រប់គ្រងទំនាក់ទំនងប្រទេសមហាអំណាច ដែលយន្តការទាំងនោះបានបាត់បង់ នៅក្នុងពិភពពហុប៉ូលនាពេលបច្ចុប្បន្ននេះ។ លោក បានព្រមានថា ពិភពលោករបស់យើង កំពុងឈានចូលដល់សម័យកាលនៃភាពចលាចល ជាភាពសេរីដ៏គ្រោះថ្នាក់ និងមិនអាចព្យាករណ៍ទុកជាមុនបាន សម្រាប់ទាំងអស់គ្នា ជាមួយនឹងនិទណ្ឌភាពទាំងស្រុង៕