ការប្រយុទ្ធគ្នាយ៉ាងខ្លាំងក្លា និងការវាយប្រហារជាថ្មីដោយអ៊ីស្រាអែល នៅភាគខាងត្បូងនៃតំបន់ហ្កាហ្សាស្ទ្រីប បាននិងកំពុងបន្ត។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានរាយការណ៍កាលពីយប់ថ្ងៃអង្គារថា «ការវាយប្រហាររបស់អ៊ីស្រាអែលយ៉ាងខ្លាំងពីផ្លូវអាកាស ផ្លូវគោក និងផ្លូវសមុទ្រ នៅតែបន្ត នៅទូទាំងតំបន់ហ្កាហ្សាស្ទ្រីប ជាពិសេសនៅក្នុង និងជុំវិញទីក្រុងខាន់យូនីស។

OCHA បាននិយាយថា មានការស្លាប់ជនស៊ីវិលបន្ថែមទៀត ការផ្លាស់ទីលំនៅរបស់ប្រជាជន និងការបំផ្លិចបំផ្លាញហេដ្ឋារចនាសម្ព័ន្ធស៊ីវិល។

កងទ័ពអ៊ីស្រាអែល បានប្រកាសកាលពីថ្ងៃពុធថា៖«ក្រុមភេរវករប្រដាប់អាវុធជាច្រើនក្រុម ត្រូវបានកម្ទេច ហើយអាវុធជាច្រើន ត្រូវបានរឹបអូស។ សេចក្តីថ្លែងការណ៍ បានបន្តនិយាយថា ទាហានឆ័ត្រយោង «បានសម្លាប់ភេរវកររាប់សិបនាក់នៅទីក្រុងខាន់យូនីស ក្នុងរយៈពេល ២៤ម៉ោងចុងក្រោយនេះ»។

នៅក្នុងឧប្បត្តិហេតុមួយ នៅភាគខាងលិចនៃទីក្រុងខាន់យូនីស ទាហានបានជួបប្រទះខ្មាន់កាំភ្លើងបីនាក់ដែលបានបាញ់មីស៊ីលប្រឆាំងរថក្រោះមកលើពួកគេ។ ខ្មាន់កាំភ្លើងទាំងបីនាក់នោះ និង ប្រតិបត្តិករភេរវកម្មជាច្រើននាក់ផ្សេងទៀត ត្រូវបានសម្លាប់ នៅក្នុងការប្រយុទ្ធក្នុងសង្កាត់ក្បែរនោះ។