យោងតាមការដកស្រង់របាយការណ៍របស់អង្គការសហប្រជាជាតិដែលពុំបានផ្សព្វផ្សាយ ត្រូវបានពិនិត្យឡើងវិញដោយសារព័ត៌មាន Reuters ក្រុមអ្នកឃ្លាំមើលការដាក់ទណ្ឌកម្មរបស់អង្គការសហប្រជាជាតិ កំពុងស៊ើបអង្កេតការវាយប្រហារតាមអ៊ីនធឺណិត ឬតាមបច្ចេកវិទ្យាជាច្រើនដែលសង្ស័យថាបានធ្វើឡើងដោយប្រទេសកូរ៉េខាងជើងលើទឹកប្រាក់ចំនួន៣ពាន់លានដុល្លារ ដើម្បីជួយប្រទេសនេះអភិវឌ្ឍកម្មវិធីអាវុធនុយក្លេអ៊ែរបន្ថែមទៀត ។ 

ក្រុមអ្នកឃ្លាំមើលទណ្ឌកម្មឯករាជ្យបានរាយការណ៍ទៅកាន់គណៈកម្មាធិការក្រុមប្រឹក្សាសន្តិសុខដោយប្រើប្រាស់ឈ្មោះផ្លូវការរបស់កូរ៉េខាងជើងថា សាធារណរដ្ឋប្រជាធិបតេយ្យប្រជាមានិតកូរ៉េ (DPRK) បានបន្តបំពានទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ។  

ក្រុមអ្នកឃ្លាំមើលបានសរសេរថា កូរ៉េខាងជើងបានបន្តអភិវឌ្ឍអាវុធនុយក្លេអ៊ែរបន្ថែមទៀត និងផលិតតឧបករណ៍សម្រាប់មហិច្ឆិតានុយក្លេអ៊ែ ទោះបីជាការសាកល្បងនុយក្លេអ៊ែរដែលគេស្គាល់ចុងក្រោយរបស់ខ្លួនបានធ្វើឡើងកាលពីឆ្នាំ ២០១៧ ក៏ដោយ។ 

ក្រុមនេះក៏បាននិយាយផងដែរថាទីក្រុងព្យុងយ៉ាងនៅតែបន្តបាញ់សាកល្បងមីស៊ីលបាលីស្ទីក  បញ្ជូនផ្កាយរណបចូលទៅក្នុងគន្លងតារាវិថី និងបានបន្ថែមនាវាមុជទឹកវាយប្រហារតាកទិកមានសមត្ថភាពនុយក្លេអ៊ែរចូលក្នុងឃ្លាំងអាវុធទៀតផង។    

ក្រុមអ្នកឃ្លាំមើលមួយនេះ បានសរសេរថា ក្រុមនេះកំពុងស៊ើបអង្កេតលើករណីចំនួន៥៨ ដែលគេសង្ស័យថាការវាយប្រហារតាមអ៊ីនធឺណិតរបស់កូរ៉េខាងជើងលើក្រុមហ៊ុនដែលទាក់ទងនឹងរូបិយប័ណ្ណគ្រីបតូនៅចន្លោះឆ្នាំ ២០១៧ និង២០២៣  មានតម្លៃប្រហែល ៣ពាន់លានដុល្លារ ដែលតាមសេចក្តីរាយការណ៍ថា ប្រាក់នេះបានជួយដល់ការអភិវឌ្ឍន៍ អាវុធមហាប្រល័យ (MD)របស់កូរ៉េខាងជើង៕