ទីភ្នាក់ងារសារព័ត៌មានរុស្ស៊ី បានរាយការណ៍ថា លោកប្រធានាធិបតី វ្ល៉ាឌីមៀ ពូទីន បាន​ប្រាប់​មេ​ដឹកនាំ​សហគមន៍ជ្វីហ្វរបស់រុស្ស៊ីកាលពីថ្ងៃពុធថា ទីក្រុងមូស្គូ បានសម្រេច «លទ្ធផលជាក់លាក់» ក្នុងកិច្ចខិតខំប្រឹងប្រែងការទូត ដើម្បីដោះលែងចំណាប់ថ្នូរ ដែលជាប់ក្នុងជម្លោះអ៊ីស្រាអែល​ជាមួយ​ក្រុម​ហាម៉ាស។

ទីភ្នាក់ងារទាំងនោះ បាននិយាយថា លោក ពូទីន បានធ្វើការអត្ថាធិប្បាយ​នៅ​ក្នុង​កិច្ច​ប្រជុំ​ជាមួយ​ប្រធាន​រ៉ាប៊ីរបស់រុស្ស៊ី លោក ប៊ឺល ឡាហ្សា (Berl Lazar) និងប្រធានសហព័ន្ធសហគមន៍ជ្វីហ្វ លោក អាឡិចសាន់ឌឺ បូរ៉ូដា (Alexander Boroda)។ លោក ពូទីន បាននិយាយថា រុស្ស៊ី បាន​ប្រើ​ទំនាក់​ទំនងរបស់ខ្លួនជាមួយនឹងអ្នកនយោបាយរបស់ក្រុមហាម៉ាស។

លោកពូទីន ត្រូវបានដកស្រង់សម្តីថា៖ «អ្នកដឹងរួចហើយ ចាប់តាំងពីស្ថានការណ៍ កាន់តែ​តាន​តឹង​នៅ​មជ្ឈិមបូព៌ា រុស្ស៊ីបានធ្វើអ្វីៗគ្រប់យ៉ាង ដើម្បីជួយមនុស្សដែលក្លាយជាចំណាប់ថ្នូរ»។

«ដូចដែលគេដឹងហើយ ក្រសួងការបរទេសរបស់យើង បានធ្វើ​ការ​តាមរយៈ​អ្នក​នយោបាយ​របស់​ក្រុម​ហាម៉ាស ហើយសរុបមក មានលទ្ធផលជាក់លាក់»។

លោកពូទីន មិនបានបញ្ជាក់លម្អិតទេ នេះបើតាមការអត្ថាធិប្បាយដែលគេបានរាយការណ៍នោះ។

លោក​ប្រធានាធិបតីរូបនេះ បាននិយាយថា កិច្ចខិតខំប្រឹងប្រែងរបស់ទីក្រុងមូស្គូ ទោះបី​ជា​សំដៅ​លើ​ការ​ជួយ​ជនជាតិរុស្ស៊ីក៏ដោយ ក៏លោកបានព្យាយាមជួយអ្នកដទៃផងដែរ៕