ការធ្វើអន្តោប្រវេសន៍មិនទៀងទាត់ទៅកាន់សហភាពអឺរ៉ុប ពីអាហ្រ្វិកខាងលិច បានកើនឡើងជាង​ដប់ដង​ក្នុងមួយឆ្នាំនៅក្នុងខែមករា នេះបើយោងតាមយោងតាមទីភ្នាក់ងារព្រំដែន ហ្រ្វុនថេក (Frontex) របស់ប្លុកដែលរំពឹងថាការមកដល់សរុបនឹងកើនឡើងថែមទៀតនៅឆ្នាំ២០២៤ នេះ ហើយនិយាយថាការបញ្ឈប់ទាំងស្រុងនៃបម្លាស់ទីរបស់ប្រជាជនទាំងនោះគឺមិនអាចទៅរួចនោះទេ។

នៅពេលត្រូវសាកសួរអំពីការបោះឆ្នោតសភានៅទូទាំងសហភាពអឺរ៉ុបខែមិថុនា ដែលការធ្វើ​អន្តោ​ប្រវេសន៍​គឺជាបញ្ហាចម្បង ប្រមុខទីភ្នាក់ងារព្រំដែន ហ្រ្វុនថេក លោក ហានស៍ ឡៃថិនស៍ (Hans Leijtens) ដែលអតីតឆ្មាំព្រំដែនហូឡង់រូបនេះបានប្រាប់សារព័ត៌មានរ៉យទ័រ ថាការបញ្ឈប់​ទាំងស្រុង នៃការមកដល់មិនទៀងទាត់របស់ជនអន្តោប្រវេសន៍គឺមិនមែនជាការពិត និងមិនអាច​ទៅរួចនោះទេ។

កាលពីឆ្នាំមុនទីភ្នាក់ងារព្រំដែន ហ្រ្វុនថេក បានកត់ត្រាការឆ្លងកាត់ច្រកព្រំដែនមិនទៀងទាត់ចំនួន ៣៨០.០០០នាក់ ដែលជាចំនួនខ្ពស់បំផុតចាប់តាំងពីឆ្នាំ២០១៦។ នោះបានកត់សម្គាល់កំណើនមួយឆ្នាំជាប់ៗគ្នាចាប់តាំងពីជំងឺរាតត្បាតកូវីដ ក្នុងឆ្នាំ ២០២០ មក។

ជនដែលរត់ភៀសខ្លួនពីសង្រ្គាមមានសិទ្ធិជ្រកកោននៅក្នុងសហភាពអឺរ៉ុប ដែលបានផ្តល់ជម្រកដល់ប្រជាជនអ៊ុយក្រែន រាប់លាននាក់ ដែលភៀសខ្លួនពីការលុកលុយរបស់រុស្ស៊ី តាំងពីឆ្នាំ២០២២ មក។ ជនជាតិអាហ្វ្រិកភាគច្រើនត្រូវបានគេមើលឃើញថាជាជនអន្តោប្រវេសន៍ពលកម្ម ហើយប្លុកនេះចង់រក្សាគម្របយ៉ាងតឹងរ៉ឹងលើការមកដល់បែបនេះ៕