ខណៈរដូវសែនចិន-វៀតណាមនឹងឈានមកដល់ និងដោយ​មាន​ការ​យក​ចិត្ត​ទុក​ដាក់​ពីថ្នាក់​ដឹកនាំ នៃ​ក្រសួងពាណិជ្ជកម្ម នៅព្រឹកថ្ងៃទី៨ ខែកុម្ភៈ ឆ្នាំ២០២៤នេះ មន្ដ្រីអគ្គនាយកដ្ឋាន ការពារ​អ្នក​ប្រើ​ប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) សាខារាជធានីភ្នំពេញ បាន​ចុះ​ត្រួត​ពិនិត្យ​ទំនិញនៅតំបន់ត្រឡោកបែក ខណ្ឌសែនសុខ រាជធានីភ្នំពេញ រកឃើញ​បង្គា​មាន​ចាក់​ចាហួយ​ចំនួនជាង ៤ពាន់គីឡូក្រាម។

ក្នុងបទសម្ភាសន៍ជាមួយទូរទស្សន៍ព័ត៌មាន ប៊ីធីវី ក្រោយចុះឃ្លាំមើល​ និង​ត្រួត​ពិនិត្យ​ទំនិញ​នានា​លោក ហេង មាលី ប្រធានសាខា ក.ប.ប. រាជធានីភ្នំពេញ បានមានប្រសាសន៍ប្រាប់ឲ្យដឹងថា ប្រតិបត្តិការ​នេះ ក្រុមការងារបានចាប់ផ្តើមតាំងពីម៉ោង ៣ ទៀបភ្លឺដើម្បីធ្វើការឃ្លាំមើល។ លោក​បាន​បន្ត​ថា ជាលទ្ធផល ក្រៅពីទំនិញផ្សេងៗ ដូចជាមឹក ក្តាម និងអយស្ទ័រជាដើម ពុំបាន​រក​ឃើញ​វត្ត​មាន​សារធារធាតុគីមីហាមឃាត់នោះទេ។ ប៉ុន្តែបានរកឃើញ និងដក​ហូត​បង្គា​មានចាក់ចាហ៊ួយ ចំនួន ២៦០ កេសស្មើនឹងប្រមាណ ៤ ២៣៥ គីឡូក្រាម។

នៅក្នុងប្រតិបត្តិការនេះដែរ លោក ហេង មាលី ក៏បានពន្យល់ អប់រំ ណែនាំដល់ក្រុមអាជីវករ អ្នក​ចែក​ចាយ លក់ដុំ លក់រាយ ត្រូវមានឯកសារពាក់ព័ន្ធច្បាស់លាស់ជាមុនសិន មុននឹង​ទទួល​ទិញ​យក​មក​លក់​បន្ត ហើយកុំឱ្យមានការដាក់លាយបន្ថែមនូវសារធាតុគីមីហាមឃាត់ណាមួយ ដែល​មិន​មាន​បទប្បញ្ញត្តិបច្ចេកទេសទៅលើផលិតផល ម្ហូបអាហារ នាំឲ្យប៉ះពាល់ដល់សុខភាព សុវត្ថិភាព​អ្នក​ប្រើប្រាស់។ លោកបានបន្ថែមថាវិស័យម្ហូបអាហារ ត្រូវបាន​កើន​ឡើង​ទៅ​តាម​កំណើន​ប្រជាពលរដ្ឋ តែក៏ត្រូវប្រុងប្រយ័ត្ននូវម្ហូបអាហារ ដែលមិនមាន​អនុ​លោម​ភាព​ សម្រាប់​សុខ​ភាព​របស់​ប្រជាពលរដ្ឋផងដែរ។

អ្នកនាង ណាង ស្រីនីត ពលរដ្ឋមកពីខេត្តព្រៃវែង បច្ចុប្បន្នរស់នៅរាជធានីភ្នំពេញ បាននិយាយថា សព្វ​ថ្ងៃនេះ គឺមានការព្រួយបារម្ភច្រើនអំពីសុវត្ថិភាពចំណីម្ហូបអាហារ ព្រោះមិន​សូវ​មាន​ជំនាញ​ក្នុង​ការ​ទិញ​ទំនិញ និងមិនស្គាល់ប្រភពច្រើនដូចគ្នាដែរ ដោយសារមកពីខេត្ត និងរវល់​បំពេញ​ការងារ​ប្រចាំ​ថ្ងៃ​។

សូមជម្រាបថា លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ធ្លាប់បានណែនាំជាប្រចាំ និង​ចង្អុល​បង្ហាញដល់ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃ​អគ្គ​នាយកដ្ឋាន ក.ប.ប. ដែលជាសេនាធិការ ពង្រឹងឱ្យខានតែបាននូវ ការត្រួតពិនិត្យជាប្រចាំ និង​នៅ​ទូទាំងប្រទេស ដើម្បីធានាបាននូវទំនិញម្ហូបអាហារប្រកបដោយគុណភាព និងមាន​សុវត្ថិភាព​ខ្ពស់ និងបន្តអប់រំឱ្យប្រតិបត្តិករអាជីវកម្មម្ហូបអាហារ ប្រកបអាជីវកម្មរបស់ខ្លួនដោយសុចរិត និង​ស្វែង​យល់​ពី​អំពើ​ល្មើស​ពាក់ព័ន្ធ​នឹង​ការ​ប្រកប​អាជីវកម្ម​ដែល​បង្ក​ឱ្យ​មាន​ហានិភ័យ​ដល់​សុខភាព​ប្រជា​ពលរដ្ឋ ក្នុងការប្រើប្រាស់សារធាតុគីមីហាមឃាត់ ឬការប្រើប្រាស់លើសកម្រិតជាដើម៕ អត្ថបទ៖ ឈិត បូរ៉ាវី