ប្រជាជនប៉ាគីស្ថានរាប់លាននាក់ កំពុងធ្វើដំណើរទៅកាន់មណ្ឌលបោះឆ្នោតដើម្បីបោះឆ្នោតរដ្ឋាភិបាលថ្មីក្នុងពេលមានអតិផរណាហក់ឡើង ការកើនឡើងអំពើហិង្សា និងការអះអាងពីការក្លែងបន្លំសន្លឹកឆ្នោត។

ការបោះឆ្នោតនេះ ធ្វើឡើងរយៈពេលជិតពីរឆ្នាំ ចាប់តាំងពីនាយករដ្ឋមន្ត្រីមុនដែលបានក្លាយជាអ្នកនយោបាយពីកីឡាករគ្រីឃីត លោក Imran Khan ដែលត្រូវបានបណ្តេញចេញដោយការបោះឆ្នោតដកសេចក្តីទុកចិត្ត។ នាយករដ្ឋមន្ត្រីបីសម័យកាល លោក ណាវ៉ា ហ្សារីហ្វ(Nawaz Sharif) បានស្ថិតនៅលើសន្លឹកឆ្នោត។ អ្នកវិភាគជាច្រើន និយាយថា វាជាការបោះឆ្នោតដែលមានទំនុកចិត្តតិចបំផុតរបស់ប្រទេសប៉ាគីស្ថាន។ ប្រទេសប៉ាគីស្ថាន បានផ្អាកសេវាកម្មទូរស័ព្ទជាច្រើននាទី មុនពេលការបោះឆ្នោតចាប់ផ្តើម។ ទាំងការហៅទូរស័ព្ទ និងសេវាកម្មទិន្នន័យ ត្រូវបានផ្អាក ទោះបីជាបណ្តាញ Wifi នៅតែដំណើរការក៏ដោយ។ អ្នកនាំពាក្យក្រសួងមហាផ្ទៃ បាននិយាយថា វិធានការនេះត្រូវបានធានាសម្រាប់ហេតុផលសន្តិសុខ ដោយលើកឡើងពីឧប្បត្តិហេតុនៃសកម្មភាពភេរវកម្មថ្មីៗ នៅក្នុងប្រទេស។ ការបំផ្ទុះគ្រាប់បែក បានសម្លាប់មនុស្ស ៣០នាក់ នៅក្នុងខេត្ត បាឡូជីសស្តាន(Balochistan) ដ៏ជ្រួលច្រាល់ កាលពីថ្ងៃពុធ មួយថ្ងៃមុនការបោះឆ្នោត។

ប្រជាជនចំនួន ១២៨លាននាក់ ត្រូវបានចុះឈ្មោះដើម្បីបោះឆ្នោតរបស់ពួកគេ ដោយស្ទើរតែពាក់កណ្តាល មានអាយុក្រោម ៣៥ ឆ្នាំ។ ពួកគេនឹងជ្រើសរើសរវាងបេក្ខជនជាង ៥.០០០នាក់ ដែលក្នុងនោះមានតែ ៣១៣នាក់ប៉ុណ្ណោះជាស្ត្រី។

គណបក្សសម្ព័ន្ធមូស្លីមប៉ាគីស្ថាន និងគណបក្សប្រជាជនប៉ាគីស្ថាន (PPP) ត្រូវបានចាត់ទុកថាជាគណបក្សធំៗចំនួនពីរ ដែលចូលរួមក្នុងការបោះឆ្នោតនេះ។