ក្រុមហ៊ុនការពារជាតិប៉ាគីស្ថានមួយ បានបង្ហាញយានដ្រូនចុងក្រោយបំផុតរបស់ខ្លួនឈ្មោះ Ranger នៅក្នុងកម្មវិធីតាំងពិព័រណ៍ការពារពិភពលោក ( World Defense Show) ដែលប្រព្រឹត្តទៅនៅថ្ងៃទី ៤-៨ ខែកុម្ភៈ ក្នុងប្រទេសអារ៉ាប៊ីសាអ៊ូឌីត។

ក្រុមហ៊ុន Global Industrial Defense Solutions (GIDS)ពិពណ៌នាអំពីយានដ្រូនRanger ថា ជាយានអាកាសគ្មានមនុស្សបើក(UAV)យុទ្ធសាស្ត្រ។ វាត្រូវបានផលិតឡើងសម្រាប់ការស៊ើបការណ៍សម្ងាត់ ការឃ្លាំមើល ការកំណត់គោលដៅ និងបេសកកម្មឈ្លបយកការណ៍ ក៏ដូចជាសម្រាប់តួនាទីកែតម្រូវការបាញ់កាំភ្លើងធំ។

ក្រុមហ៊ុនGIDS សរសើរយានដ្រូននេះថា អាចដំណើរការដោយស្វ័យប្រវត្តិជាមួយនឹងសមត្ថភាពបន្ទុកដែលប្រើដោយបញ្ញាសិប្បនិម្មិត។

ស្លាបចក្រតូចៗចំនួន៤ អាចធ្វើឲ្យវាហោះឡើងត្រង់បាន ខណៈពេលដែលស្លាបចក្រជំរុញធំដែលធ្វើឲ្យការជំរុញចលនាទៅមុខ បានខ្លាំង។

ក្រុមហ៊ុន GIDS ក៏កំពុងផ្សព្វផ្សាយប្រព័ន្ធបានរ៉ុក្កែតច្រើនគ្រាប់តម្រង់គោល Fatah II របស់ខ្លួនផងដែរ ដែលបានសាកល្បងដំបូងក្នុងខែធ្នូ ឆ្នាំ ២០២៣។ ប្រព័ន្ធរ៉ុក្កែតប្រភេទថ្មីនេះ អាចបាញ់បានចម្ងាយ ២៩០ គីឡូម៉ែត្រ។