នៅក្នុងលិខិតមួយដែលផ្ញើទៅរដ្ឋសភា កាលពីថ្ងៃពុធ (ទី៧ ខែកុម្ភៈ) រដ្ឋមន្ត្រីក្រសួងយុត្តិធម៌លោក Merrick Garland បានឲ្យដឹងថា ទីប្រឹក្សាពិសេសលោក Robert Hur បានបញ្ចប់ការស៊ើបអង្កេតរបស់លោកហើយពាក់ព័ន្ធនឹងថា តើប្រធានាធិបតីអាមេរិកលោក Joe Biden បានគ្រប់គ្រងដោយមិនត្រឹមត្រូវលើឯកសារសម្ងាត់ អំឡុងពេលលោកកាន់តំណែងជាអនុប្រធានាធិបតីដែរ ឬទេ។

លោក Garland បានប្រាប់នៅក្នុងលិខិតផ្ញើទៅកាន់ថ្នាក់ដឹកនាំគណៈកម្មាធិការតុលាការរដ្ឋសភា និងព្រឹទ្ធសភាថា លោក Hur បានបញ្ជូនរបាយការណ៍ចុងក្រោយរបស់លោកទៅកាន់សេតវិមាន និងមេធាវីផ្ទាល់ខ្លួនរបស់លោក Biden រួចហើយ ដើម្បីឲ្យមានការបញ្ចេញមតិយោបល់ និងពិនិត្យឡើងវិញ សម្រាប់បុព្វសិទ្ធក្នុងការបញ្ចេញឯកសារសម្ងាត់។

បន្ទាប់ពីការត្រួតពិនិត្យរបស់សេតវិមាន លោក Garland បាននិយាយថា របាយការណ៍របស់ទីប្រឹក្សាពិសេសនឹងត្រូវបញ្ជូនទៅសភា ហើយលោកបានបន្ថែមថា លោកនឹងធ្វើរបាយការណ៍ជាសាធារណៈឲ្យបានច្រើនតាមតែអាច ស្របតាមតម្រូវការច្បាប់ និងគោលនយោបាយរបស់ក្រសួង។

អ្នកនាំពាក្យសេតវិមាន លោក Ian Sams បាននិយាយថា សេតវិមានរំពឹងថា ការត្រួតពិនិត្យបុព្វសិទ្ធិនៃរបាយការណ៍នេះនឹងត្រូវបានបញ្ចប់នៅចុងសប្តាហ៍នេះ។

សូមបញ្ជាក់ថា ការស៊ើបអង្កេតនេះបានផ្តោតទៅលើឯកសារដែលទាក់ទងនឹងការថែទាំគ្រប់គ្រងរបស់លោក Biden ក្នុងនាមជាអនុប្រធានាធិបតីនៃអតីតប្រធានាធិបតីរបស់គណបក្សប្រជាធិបតេយ្យ គឺលោក Barack Obama ពីឆ្នាំ២០០៩-២០១៧ និងពីអាណត្តិមុនរបស់លោកនៅក្នុងព្រឹទ្ធសភាសហរដ្ឋអាមេរិក។ ឯកសារទាំងនោះត្រូវបានរកឃើញនៅគេហដ្ឋាន និងអតីតការិយាល័យរបស់លោក Biden៕