អាជ្ញាធររៀបចំការបោះឆ្នោតរបស់ប្រទេសអែលសាល់វ៉ាឌ័រ កាលពីថ្ងៃពុធ (ទី៧ ខែកុម្ភៈ) បាននិយាយថា ខ្លួននឹងចាប់ផ្តើមរាប់សន្លឹកឆ្នោតដោយដៃសម្រាប់ការបោះឆ្នោតជ្រើសរើសប្រធានាធិបតី និងសភានីតិបញ្ញត្តិរបស់ប្រទេស បន្ទាប់ពីមានការរាយការណ៍ថា ប្រព័ន្ធបញ្ជូនសន្លឹកឆ្នោត មានកំហុសឆ្គង។

ជ័យជម្នះរបស់ប្រធានាធិបតីលោក Nayib Bukele ជាមួយនឹងចំនួន ៨៣ភាគរយនៃសំឡេងភាគច្រើន ដែលត្រូវបានរាប់ មិនមានអ្វីត្រូវសង្ស័យនោះទេ ប៉ុន្តែចំណុចសំខាន់គឺការផ្ដោតលើអាសនៈសភាចំនួន៦០ របស់ប្រទេស។ សំឡេងភាគច្រើនដាច់ខាតនៅក្នុងសភា នឹងផ្តល់ឲ្យលោក Bukele នូវអំណាចដែលមិនធ្លាប់មានពីមុនមក រួមទាំងអាចឲ្យគាត់ផ្លាស់ប្តូររដ្ឋធម្មនុញ្ញរបស់ប្រទេស និងបន្តកាត់បន្ថយសិទ្ធិរដ្ឋធម្មនុញ្ញ នៅក្នុងការបង្ក្រាបដ៏មានប្រជាប្រិយរបស់លើលើក្រុមអន្ធពាលរបស់ប្រទេស ដែលបាននាំឲ្យមានការរិះគន់ពីក្រុមសិទ្ធិមនុស្ស។

កាលពីថ្ងៃអាទិត្យ (ទី៤ ខែកុម្ភៈ) បន្ទាប់ពីការប្រកាសខ្លួនឯងថា ជាអ្នកទទួលបានជ័យជម្នះ លោកបាននិយាយថា គណបក្សគំនិតថ្មី (New Ideas) របស់លោកបានទទួលអាសនៈចំនួន៥៨ ក្នុងចំណោមអាសនៈចំនួន ៦០ នៅក្នុងសភា ទោះបីជាមានត្រឹមតែ ៥ភាគរយនៃសន្លឹកឆ្នោតសម្រាប់អាសនៈ ដែលត្រូវបានរាប់ក៏ដោយ។ ស្ថាប័នរៀបចំការបោះឆ្នោតនៅមិនទាន់ប្រកាសអ្នកឈ្នះជាផ្លូវការនៅឡើយទេ ក្នុងការបោះឆ្នោតនេះ។

សេចក្តីប្រកាសរបស់លោក Bukele គឺជាការផ្តោតសំខាន់នៃការត្រួតពិនិត្យ បន្ទាប់ពីមានការបរាជ័យជាប្រព័ន្ធជាមួយនឹងរបាយការណ៍ជាច្រើនអំពីភាពមិនប្រក្រតី កំហុសឆ្គង និងការដាច់ចរន្តអគ្គិសនី និងប្រព័ន្ធអ៊ីនធឺណិត។ លោកស្រី Dora Esmeralda Martinez ប្រធានអាជ្ញាធររៀបចំការបោះឆ្នោតបាននិយាយនៅលើកញ្ចក់ទូរទស្សន៍ជាតិ កាលពីថ្ងៃចន្ទ (ទី៥ ខែកុម្ភៈ) ថា៖ «ភាពរអាក់រអួលមួយចំនួនបានធ្វើឲ្យមានការពិបាកសម្រាប់ការរាប់ ដើម្បីឲ្យមានភាពរលូនដូចបានគ្រោងទុក»៕