រដ្ឋាភិបាលនីការ៉ាហ្គ័រ និយាយកាលពីថ្ងៃពុធថា ខ្លួនបានផ្តល់សិទ្ធិជ្រកកោនដល់អតីតប្រធានាធិបតីប៉ាណាម៉ាលោក Ricardo Martinelli ក្រោយអតីតមេដឹកនាំម្នាក់នេះដែលបច្ចុប្បន្នប្រឈមនឹងការជាប់ពន្ធនាគាររយៈពេលយូរក្នុងពន្ធនាគារនៅប្រទេសកំណើតរបស់លោកនោះ បានស្នើសុំការការពារនៅស្ថានទូតនីការ៉ាហ្គ័រ ស្ថិតក្នុងទីក្រុងប៉ាណាម៉ា ។ 

យោងតាមសេចក្តីថ្លែងការណ៍ពីក្រសួងការបរទេសនីការ៉ាហ្គ័រ បានឲ្យដឹងថា លោក Martinelli ដែលបានប្រកាសរួចទៅហើយពីការឡើងដណ្តើមតំណែងប្រធានាធិបតីម្តងទៀតនៅការបោះឆ្នោតពេលក្រោយក្នុងឆ្នាំនេះ បានយល់ឃើញខ្លួនឯងថាជាជនរងគ្រោះនៃការបៀតបៀននយោបាយលើជីវិតរបស់លោក ។ 

កាលពីចុងសប្តាហ៍មុន តុលាការកំពូលប៉ាណាម៉ា បានច្រានចោលបណ្តឹងឧទ្ធរណ៍របស់លោក Martinelli ដើម្បីទុកជាមោឃៈការកាត់ទោសឲ្យជាប់ពន្ធនាគាររយៈពេល ១១ឆ្នាំ ដោយសារការកាត់ទោសកាលពីឆ្នាំមុន ជុំវិញករណីចោទប្រកាន់លាងលុយកខ្វក់ ។ 

ទោះបីជាមានការកាត់ទោសបែបនេះយ៉ាងណាក៏ដោយ លោក Martinelli ដែលធ្លាប់ជាប្រធានាធិបតីប្រទេសនៅអាមេរិកកណ្តាលមួយនេះ ចាប់ពីឆ្នាំ ២០០៩ ដល់ឆ្នាំ ២០១៤ បាននាំមុខការស្ទង់មតិ មុនការបោះឆ្នោតជ្រើសរើសប្រធានាធិតីនាខែឧសភាខាងមុខនេះ ។ 

ខណៈពេលនោះដែរ ក្រសួងការបរទេសប៉ាណាម៉ា ពុំបានឆ្លើយតបភ្លាមៗនោះទេចំពោះសំណើរសុំសេចក្តីអត្ថាធិប្បាយជុំវិញបញ្ហាមួយនេះ ៕