របាយការណ៍បាននិយាយថា ប្រទេសរុស្ស៊ី បានបញ្ចេញទ្រព្យសម្បត្តិហិរញ្ញវត្ថុ ដែលគេបង្កក រាប់លានដុល្លារទៅឲ្យកូរ៉េខាងជើង ជាថ្នូរនឹងអាវុធ។

យោងតាមរបាយការណ៍ពីសារព័ត៌មាន The New York Times បានឲ្យដឹងថា ទឹកប្រាក់ប្រមាណ ៩លានដុល្លារ ត្រូវបានបញ្ចេញ បន្ទាប់ពីការផ្តល់អាវុធសម្រាប់ការឈ្លានពានរបស់រុស្ស៊ីលើអ៊ុយក្រែន។

របាយការណ៍នេះ បានលើកឡើងពីមន្ត្រីចារកម្មជាច្រើននាក់មកពីសហរដ្ឋអាមេរិក និងចក្រភពអង់គ្លេស។

ប្រាក់ចំនួន ៩លានដុល្លារនេះ គ្រាន់តែជាចំណែកនៃទ្រព្យសកម្មកូរ៉េខាងជើងដែលត្រូវបង្កក ប្រមាណ៣០ លានដុល្លារប៉ុណ្ណោះដែលត្រូវបានរក្សាទុកនៅក្នុងស្ថាប័នហិរញ្ញវត្ថុឯកជនរុស្ស៊ីមួយ។

មន្ត្រីចារកម្មដែលមិនបញ្ចេញឈ្មោះ បានប្រាប់កាសែតសារព័ត៌មាន New York Times ថា ប្រាក់ដែលត្រូវបានបញ្ចេញនេះ ទំនងជានឹងត្រូវប្រើប្រាស់ ដើម្បីទិញប្រេងឆៅ។

ពួកគេក៏បានអះអាងប្រាប់សារព័ត៌មាននេះថា ក្រុមហ៊ុនសំខាន់ៗរបស់កូរ៉េខាងជើង បានបើកគណនីបន្ថែមទៀតនៅក្នុងធនាគារដែលមានមូលដ្ឋាននៅក្នុងរដ្ឋ South Ossetia ក្នុងតំបន់កូកាស(Caucus)។