អង្គការឃ្លាំមើលសិទ្ធិមនុស្ស (HRW) បាននិយាយនៅក្នុងរបាយការណ៍ថ្មីមួយដែលវិភាគការបំផ្លិចបំផ្លាញ បានកើតឡើងលើទីក្រុងអ៊ុយក្រែនថា ប្រធានាធិបតីរុស្ស៊ី លោក វ្ល៉ាឌីមៀ ពូទីន គួរតែប្រឈមមុខនឹងការស៊ើបអង្កេតឧក្រិដ្ឋកម្មសង្រ្គាមចំពោះការវាយប្រហាដ៏ឃោរឃៅរបស់ទីក្រុងមូស្គូទៅលើទីក្រុងម៉ារីប៉ូល ( Mariupol) ដែលបានបណ្តាលឲ្យមនុស្សរាប់ពាន់នាក់ស្លាប់ អគាររាប់មិនអស់ ត្រូវបានបំផ្លាញ ហើយត្រូវបានបន្តដោយយុទ្ធនាការដ៏រីករាលដាលនៃ ការតម្រូវឲ្យគាំទ្រវប្បធម៌ និងភាសារុស្ស៊ី។ 

ក្រុមឃ្លាំមើលអន្តរជាតិ បានរកឃើញថា ការឡោមព័ទ្ធរបស់រុស្ស៊ីលើទីក្រុងនេះ ក្នុងឆ្នាំ២០២២ ពាក់ព័ន្ធនឹងការកំណត់គោលដៅម្តងហើយម្តងទៀត និងការបំផ្លាញអគារស៊ីវិល និងហេដ្ឋារចនាសម្ព័ន្ធ ដែលជាការរំលោភជាក់ស្តែងនៃច្បាប់មនុស្សធម៌អន្តរជាតិ។

ក្រុមឃ្លាំមើលនេះ បានប៉ាន់ប្រមាណថា មនុស្សប្រហែល ៨.000នាក់ បានស្លាប់ ដោយសារលទ្ធផលផ្ទាល់នៃការប្រយុទ្ធគ្នា ដោយធ្វើការពិនិត្យឡើងវិញនៃរូបភាពផ្កាយរណប រូបថត និងវីដេអូនៃទីបញ្ចុះសពរបស់ទីក្រុងនេះ ប៉ុន្តែបានកត់សម្គាល់ថា តួលេខនេះ គឺជាការប៉ាន់ស្មានបែបអភិរក្ស។

របាយការណ៍កម្រាស់ ២១៥ទំព័រ ផ្អែកលើការស្រាវជ្រាវដែលធ្វើឡើងក្នុងរយៈពេលជិត ២ឆ្នាំ ដោយសហការជាមួយក្រុមសិទ្ធិមនុស្សអ៊ុយក្រែន Truth Hounds កិច្ចខិតខំប្រឹងប្រែងលម្អិតដោយអាជ្ញាធររុស្ស៊ីក្នុងការលុបបំបាត់វប្បធម៌អ៊ុយក្រែនចេញពីទីក្រុង ចាប់តាំងពីការចាប់ខ្លួន ការកំណត់ចលនារបស់ជនជាតិអ៊ុយក្រែន និងតម្រូវឲ្យមានការនិទានរឿងគាំទ្រវិមានក្រឹមឡាំង នៅតាមសាលារៀន និងទីសាធារណៈ។