វីដេអូដែលទទួលបានពីអ្នកសារព័ត៌មានរ៉យទ័រ បានបង្ហាញរថយន្ដ១គ្រឿងត្រូវភ្លើងឆេះក្នុងក្រុងបាដាត កាលពីថ្ងៃពុធ ក្នុងសង្កាត់មួយដែលយានដ្រូនរបស់អាមេរិក បានវាយប្រហារសម្លាប់មមេបញ្ជាការម្នាក់មកពីក្រុមកាតាអ៊ិបហេសបូឡា (Kataib Hezbollah)ជាក្រុមប្រដាប់អាវុធមួយគាំទ្រដោយអ៊ីរ៉ង់ក្នុងប្រទេសអ៊ីរ៉ាក់។

ប្រភពចំនួនពីរពីសន្ដិសុខ បាននិយាយ នៅក្នុងលក្ខខណ្ឌមិនប្រាប់ឈ្មោះថា មេបញ្ជាការរូបនោះឈ្មោះអាប៊ូ បាគៀរ អាល់សាអាឌី (Abu Baqir al-Saadi) ត្រូវបានសម្លាប់នៅក្នុងការវាយប្រហារដោយយានដ្រូនលើរថយន្ដ១គ្រឿង នៅភាគខាងកើតក្រុងបាដាត។

អ្នកសារព័ត៌មានរ៉យទ័រ អាចបញ្ជាក់ទីតាំងនៅក្នុងវីដេអូតាមភិនភាគអគារមួយ ទីតាំងភ្លើងបំភ្លឺផ្លូវ ហាង និងប្លង់អគារជុំវិញដែលបានឃើញនោះ ស៊ីគ្នានឹងរូបភាពផ្កាយរណប ហើយនិងការផ្ដិតយករបស់អ្នកយកពត៌មានរ៉យទ័រពីកន្លែងកើតហេតុ។

ប្រភពមួយក្នុងចំណោមប្រភពជាច្រើន បាននិយាយថា មនុស្ស៣នាក់ ត្រូវបានសម្លាប់ ដោយបញ្ជាក់ថា រថយន្ដដែលរងការវាយប្រហារនោះ ត្រូវបានប្រើប្រាស់ដោយកងកម្លាំងប្រមូលផ្ដុំប្រជាប្រិយអ៊ីរ៉ាក់ ដែលជាទីភ្នាក់ងាសន្ដិសុខរដ្ឋមួយប្រមូលផ្ដុំដោយកម្លាំងប្រដាប់អាវុធរាប់សិបនាក់ដែលភាគច្រើនមានទំនាក់ទំនងជិតស្និទជាមួយប្រទេសអ៊ីរ៉ង់។

ទាហាននអាមេរិកបីនាក់ ត្រូវបានសម្លាប់កាលពីខែមករា នៅក្នុងការវាយប្រហារដោយយានដ្រូនមួយ នៅជិតព្រំដែនប្រទេសហ្ស៊កដានី-ស៊ីរី ដែលមន្ទីរបញ្ចកោណឲ្យដឹងថា ជាការតាមយាយីរបស់ក្រុម កាតាអ៊ិប ហេសបូឡា (Kataib Hezbollah)។ក្រុមនេះ បន្ទាប់មក បានប្រកាសថាខ្លួន បានផ្អាកប្រតិបត្ដិការយោធាប្រឆាំងនឹងអាមេរិកក្នុងតំបន់៕