អាមេរិក៖ អភិបាលក្រុង Miami លោកស្រី Daniella Levine Cava បាននិយាយកាលពីល្ងាចថ្ងៃព្រហស្បតិ៍ថា ក្រុមមន្ត្រីកំពុងពិចារណាវាយកម្ទេចផ្នែកដែលនៅសេសសល់នៃប៉មអគារ Champlain Towers South ខណៈប្រតិបត្តិការស្វែងរកអ្នកបាត់ខ្លួននៅតែបន្ត នៅផ្នែកមួយចំនួនដែលបានបាក់រាបដល់ដីកាលពីមួយសប្ដាហ៍មុន។
ការងារនៅលើកម្ទេចត្រូវបានផ្អាករយៈពេលជាច្រើនថ្ងៃ ខណៈក្រុមវិស្វករបានវាយតម្លៃពីសំណង់ដែលនៅតែកំពុងឈរ។ លោកស្រី Levine Cava បានប្រាប់សន្និសីទសារព័ត៌មានក្នុងពេលល្ងាចនោះថា ប្រតិបត្តិការស្វែងរកនៅតែបន្ត។ លោកស្រីបាននិយាយថា វិស្វករកំពុងធ្វើតេស្ត និងវាយតំលៃទីតាំងរបស់ខ្លួន ដើម្បីពង្រីកការស្វែងរកដល់កន្លែងផ្សេងទៀត។ លោកស្រីអភិបាលក្រុងរូបនេះបាននិយាយថា ក្រុមមន្ត្រីចាំបាច់ត្រូវធ្វើការសម្រេចចិត្តអំពីការកម្ទេចចោលដោយយកចិត្តទុកដាក់បំផុត និងប្រកបដោយវិធីសាស្ត្រ ដោយពិចារណាលើផលប៉ះពាល់ដែលវាអាចមានចំពោះគំនរបាក់បែកដែលមានស្រាប់។
លោកប្រធានាធិបតី Joe Biden បាននិយាយថា នៅតែមានសង្ឃឹមក្នុងការស្វែងរកអ្នកនៅរស់រានមានជីវិត ពីកម្ទេចថ្មអគារដែលបានបាក់រលំនោះ។ លោកនិយាយថា សហរដ្ឋអាមេរិកទាំងមូលកំពុងកាន់មរណទុក្ខជាមួយក្រុមគ្រួសារជនរងគ្រោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
