មន្រ្ដីជំនាញនៃក្រសួងបរិស្ថាន បានអះអាងថា រាជរដ្ឋាភិបាលកម្ពុជា តាមរយៈក្រសួងបរិស្ថាន និងរាជរដ្ឋាភិបាលថៃ មានកិច្ចសហប្រតិបត្តិការគ្នាយ៉ាងល្អ ក្នុងការតាមដាន ត្រួតពិនិត្យ ស្ថានភាពគុណភាពខ្យល់របស់ប្រទេសទាំងពីរ។
ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន តាមរយៈកិច្ចសម្ភាសន៍ជាមួយទូរទស្សន៍ BTV នៅថ្ងៃទី៨ ខែកុម្ភៈ ឆ្នាំ ២០២៤ នេះបានបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានបន្តរក្សាបាននូវកិច្ចសហប្រតិបត្តិការល្អរវាងកម្ពុជា-ថៃ ហើយតាមរយៈទស្សនកិច្ចផ្លូវការកាលពីថ្ងៃទី៧ ខែកុម្ភៈថ្មីៗនេះ កម្ពុជានិងថៃ ក៏បានប្រកាសដំឡើងកម្រិតទំនាក់ទំនងទ្វេភាគី ទៅជាភាពជាដៃគូយុទ្ធសាស្ត្រ ដើម្បីជំរុញកិច្ចសហប្រតិបត្តិការកាន់តែជិតស្និទ្ធ និងប្រកបដោយវិបុលភាពផងដែរ។
ឯកឧត្តមបានបញ្ជាក់ថា តាមរយៈកិច្ចសហប្រតិបត្តិការយ៉ាងល្អបែបនេះប្រទេសកម្ពុជាដែលមានក្រសួងបរិស្ថានជាសេនាធិការ បានធ្វើកិច្ចសហប្រតិបត្តិការយ៉ាងល្អលើវិស័យបរិស្ថានជាមួយប្រទេសថៃ ជាពិសេសការពិនិត្យតាមដានលើស្ថានភាពគុណភាពខ្យល់រវាងប្រទេសទាំងពីរ គ្មានការចោទប្រកាន់គ្នាអំពីការបំពុលខ្យល់ ដូចការលើកឡើងរបស់សារព័ត៌មានអន្តរជាតិ ឬបុគ្គលមួយចំនួននោះទេ។
សូមជម្រាបថា ក្រសួងបរិស្ថាន កាលពីថ្ងៃទី៣ ខែកុម្ភៈ ឆ្នាំ ២០២៤នេះ ក៏បានប្រកាសថា ការបំពុលខ្យល់នៅកម្ពុជាមានត្រឹម ២០ ទៅ ៤០ មីក្រូក្រាម ក្នុង១ម៉ែត្រគុប (g/m) តែប៉ុណ្ណោះ ដែលជា កម្រិតតូចជាងកម្រិតស្តង់ដា ៥០ មីក្រូក្រាមក្នុង១ម៉ែត្រគុប ដែលបានកំណត់ដោយអង្គការសុខភាពពិភពលោក (WHO) ហើយដែលមិនចោទជាបញ្ហាគួរឲ្យព្រួយបារម្ភដូចការផ្សព្វផ្សាយរបស់មតិ និងសារព័ត៌មានមួយចំនួននោះទេ៕ អត្ថបទ៖ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
