សមាជិកក្រុមប្រឹក្សាឃុំសង្កាត់ នៅក្នុងខេត្តកណ្ដាល បានត្រៀម​លក្ខណៈ​រួចរាល់​ហើយ​ក្នុង​ការ​ចូលរួម​ការ​បោះឆ្នោតព្រឹទ្ធសភា សម្រាប់អាណត្តិទី៥ ដែលមានសម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជាបានឈរឈ្មោះជាបេក្ខភាព។

ប្រធាន និងសមាជិកក្រុមប្រឹក្សាឃុំឈើទាល ស្រុកកៀនស្វាយ ខេត្តកណ្ដាល បានឲ្យដឹងថា ការ​បោះឆ្នោត​ជ្រើសតាំងសមាជិកព្រឹទ្ធសភា ទោះមិនមែនជាការបោះឆ្នោតសកលក៏ដោយ ប៉ុន្តែ​ក៏​ជា​ការ​បោះឆ្នោត​ដ៏មានសារៈសំខាន់ នៅក្នុងប្រទេសកម្ពុជា ដែលជាប្រទេស​ប្រកាន់​យក​របប​លទ្ធិ​ប្រជាធិបតេយ្យ។

ប្រធាន និងសមាជិកក្រុមប្រឹក្សាឃុំឈើទាលបានបន្តថា សម្រាប់ការបោះឆ្នោតព្រឹទ្ធសភា អាណត្តិ​ទី៥​នេះ សម្ដេចតេជោ ហ៊ុន សែន បានឈរឈ្មោះជាបេក្ខភាពប្រធានព្រឹទ្ធសភា ដែលនេះ​ពិត​ជា​សាកសម ពីព្រោះសម្ដេចតេជោមានគុណបំណាច់ធំធេងណាស់សម្រាប់ប្រទេសជាតិ។

សូមបញ្ជាក់ថា ការបោះឆ្នោតព្រឹទ្ធសភាអាណត្តិទី៥នេះ មាន​គណបក្ស​នយោបាយ​ចំនួន​៤​បាន​ចូល​រួមប្រកួតប្រជែង ក្នុងនោះមាន គណបក្សប្រជាជនកម្ពុជា, គណបក្សឆន្ទៈខ្មែរ, គណបក្ស​ហ៊្វុនស៊ិនប៉ិច និងគណបក្សកម្លាំងជាតិ ខណៈការ​បោះឆ្នោត​អសកល​នេះ​នឹង​ប្រព្រឹត្តិ​ទៅ​នៅ​ថ្ងៃ​ទី២៥ ខែកុម្ភៈ ឆ្នាំ២០២៤។

គួររំលឹកថា ព្រឹទ្ធសភា មានតួនាទីសំខាន់ៗចំនួន ក្នុងនោះមានមុខងារ ការពិនិត្យ និង​ឲ្យ​យោបល់​លើ​សេចក្តី​ព្រាង​ច្បាប់, មានមុខងារតាមដានការអនុវត្តច្បាប់ ហើយព្រឹទ្ធសភា​មាន​គណៈកម្មការ​ចំនួន​១០ ដែលបំពេញភារកិច្ចតាមតួនាទីរៀងៗខ្លួន។ សមាជិកព្រឹទ្ធសភា ជាតំណាង​របស់​ប្រជាជាតិ​ខ្មែរ​ទាំងមូល ពុំមែនគ្រាន់តែតំណាងប្រជាជនសម្រាប់ភូមិភាគរបស់ខ្លួននោះទេ និងមាន​មុខងារ​ក្នុង​កិច្ចសហប្រតិបត្តិការអន្តរជាតិជាដើម៕ អត្ថបទ៖ បាន សុខរិទ្ធិ