ក្រុមម៉ុងសាយជាច្រើនក្រុម នៅខេត្តកណ្ដាល នៅថ្ងៃសែនចូលឆ្នាំចិននេះ បានប្រមូលផ្ដុំគ្នា រៀបចំពិធីប៉ាយលោកតា នៅទីតាំង អ្នកតាធំ ក្រុងតាខ្មៅ។ ការរៀបចំពិធីប៉ាយលោកតានេះ គឺដើម្បីសុំសពរជ័យសិរីសួស្ដី ពីលោកតា សម្រាប់ការចេញទៅសម្ដែងនៅតាមគេហដ្ឋាន និងតាមហាងរបស់ប្រជាពលរដ្ឋ។ នេះជាការលើកឡើងរបស់ប្រធានក្រុមម៉ុងសាយសមាគមខ្មែរ-ចិន ខេត្តកណ្ដាល។

លោក ឌុល គោ ប្រធានក្រុមម៉ុងសាយសមាគមខ្មែរ-ចិន ខេត្តកណ្ដាល លើកឡើងថា ចាប់ផ្ដើមពីម៉ោងប្រមាណ ៧ ព្រឹក នៅថ្ងៃទី ៩ ខែកុម្ភៈ ជាថ្ងៃសែនចូលឆ្នាំប្រពៃណីជនជាតិចិន និងវៀតណាម ក្រុមម៉ុងសាយជាច្រើននៅខេត្តកណ្ដាល បានមកប្រមូលផ្ដុំគ្នា នៅទីតាំងអ្នកតាធំ ឬហៅថា អ្នកតា ប៉ាស៊ែ។ ការប្រមូលផ្ដុំរបស់ក្រុមម៉ុងសាយនៅថ្ងៃនេះ គឺដើម្បីធ្វើការប៉ាយសុំពរជ័យសិរីសួស្ដីពីលោកតា សម្រាប់ក្រុមម៉ុងសាយទាំងនោះ នាំយកទៅជូនប្រជាពលរដ្ឋនៅតាមផ្ទះ និងតាមហាងដែលអញ្ជើញក្រុមម៉ុងសាយទៅសម្ដែង។

លោកលើកឡើងថា ពិធីនេះជាពិធីចាំបាច់មួយសម្រាប់ម៉ុងសាយទាំងអស់ ជាពិធីដែលត្រូវប្រតិបត្តិជារៀងរាល់ឆ្នាំ មុននឹងក្រុមម៉ុងសាយទាំងអស់ ចេញទៅធ្វើការសម្ដែងនាំសេចក្ដីសុខជូនប្រជាពលរដ្ឋ។

លោកប្រធានសមាគមបន្តថា មុននឹងឈានចូលមកដល់ ការចេញសម្ដែងសម្រាប់ឱកាសពិធីបុណ្យចូលឆ្នាំប្រពៃណីជនជាតិចិន និងវៀតណាមនេះក្រុមម៉ុងសាយនីមួយៗ ត្រូវធ្វើការហ្វឹកហាត់មុនក្នុងរយៈពេលប្រមាណ៣ខែ។ ការទាមទារហ្វឹកហាត់ច្រើន គឺដើម្បីភាពស្ទាត់ជំនាញ ដើម្បីចៀសពីគ្រោះថ្នាក់នានាពេលសម្ដែង។ ក្រៅពីហ្វឹកហាត់លោកលើកឡើងថា ក៏មានការរៀបចំពិធីសែនបើកភ្នែកម៉ុងសាយផងដែរ។ ពិធីសែនបើកភ្នែក គឺរៀបចំឡើងមុនថ្ងៃសែនចូលឆ្នាំចិនមកដល់។

សូមជម្រាបថា ថ្ងៃទី ៩ ខែ កុម្ភៈ ឆ្នាំ ២០២៤នេះ ជាថ្ងៃសែនចូលឆ្នាំប្រពៃណីជនជាតិចិន និងវៀតណាម។ រីឯថ្ងៃបន្ទាប់ នៅថ្ងៃទី ១០ រហូតដល់ថ្ងៃទី ១២ ជាថ្ងៃចូលឆ្នាំចិន។ ពិធីបុណ្យចូលឆ្នាំប្រពៃណីជនជាតិចិននេះ ពុំមែនជាថ្ងៃឈប់សម្រាកនោះទេ យ៉ាងណាម៉ិញ សម្រាប់ប្រជាពលរដ្ឋខ្មែរកាត់ចិន ដែលប្រកបរបរអាជីវកម្ម តែងយកឱកាសថ្ងៃចូលឆ្នាំចិន ដើម្បីឈប់សម្រាក ធ្វើដំណើរកម្សាន្តផងដែរ៕ អត្ថបទ៖ គីម ហុក