ខេត្តពោធិ៍សាត់ ៖ នាយប់ថ្ងៃទី៨ ខែកុម្ភៈ ឆ្នាំ២០២៤ កម្លាំងចម្រុះ​នៃ​ស្នងការដ្ឋាន​នគរបាល​ខេត្ត​ពោធិ៍សាត់ ដឹកនាំផ្ទាល់ដោយ លោក ឧត្តមសេនីយ៍ត្រី នូវ តាល់ ស្នងការស្តីទី និងដោយមាន​ការ​ចូលរួម​សម្រប​សម្រួលពី ឯកឧត្តម គ្រី សីហា ព្រះរាជអាជ្ញារងសាលាដំបូងខេត្តពោធិ៍សាត់ បាន​ដាក់​គោល​ដៅអនុវត្តច្បាប់ចរាចរណ៍ ត្រួតពិនិត្យទៅលើអ្នកបើកបរយានយន្ត នៅម្តុំលូ៨ ស្ថិតក្នុង​សង្កាត់​ស្វាយអាត់ ក្រុងពោធិ៍សាត់ ។ ការចុះអនុវត្តន៍នេះ គឺស្របតាមអនុសាសន៍របស់ សម្ដេច​មហាបវរធិបតី ហ៊ុន ម៉ាណែត ឱ្យសមត្ថកិច្ចជំនាញរឹតបន្តឹងត្រួតពិនិត្យច្បាប់ចរាចរណ៍ ស្វែង​រក​ជាតិ​ស្រវឹង និងសារធាតុញៀន ទៅលើអ្នកបើកបរយានយន្ត ដើម្បីកាត់បន្ថយអត្រារបួស និងស្លាប់ ។

ជាលទ្ធផល ធ្វើការត្រួពិនិត្យរថយន្តសរុបចំនួន៦៥គ្រឿង ក្នុងនោះរថយន្តតូច៥៣គ្រឿង រថយន្ត​ធំ​ ១២​គ្រឿង ដោយធ្វើការអប់រំរថយន្តធំ១គ្រឿង ធ្វើការកែតម្រូវ​ដោះ​ភ្លើង​បំពាក់​ខុស​បច្ចេកទេស​រថយន្ត​តូច​ធំចំនួន ៧គ្រឿង ធ្វើការផាកពិន័យអ្នក​បើកបរ​រថយន្ត និង​ម៉ូតូ​ក្នុង​ស្ថានភាព​ស្រវឹង​លើស​ជាតិ​អាកុលចំនួន៤នាក់ និងឃាត់ម៉ូតូ១គ្រឿង។ ហើយកម្លាំង​ចម្រុះ​នៃ​ស្នង​ការដ្ឋាន​នគរបាល​ខេត្តពោធិ៍សាត់នឹងធ្វើ ការអនុវត្តរឹតបន្តឹងច្បាប់ចរាចរណ៍ ជាបន្តបន្តបន្ទាប់ទៀត ទាំង​នៅ​ទី​ប្រជុំ​ជន​ខេត្ត និងតាមបណ្តាលក្រុង-ស្រុកទាំង៧៕ អត្ថបទ៖ ភិរុណ ពៅ