​វាយកូនបាល់៖ ​ជើងឯក Wimbledon ៨សម័យ​កីឡាករ​ស្វ៊ី​ស Roger Federer បាន​បន្តដំណើរ​ស្វែងរក​ពាន​លើក​ទី៩ របស់ខ្លួន ក្រោយ​ជ័យជំនះ​លើ​កីឡាករ​បារាំង Richard Gasquet ដើម្បី​ឡើង​ជុំ​ទី៣ ជួប​ជាមួយ​កីឡាករ​អង់គ្លេស Cameron Norrie​។​

​​កីឡាករ​វ័យ ៣៩ឆ្នាំ Roger Federer បាន​បន្ត​ស្ថិតិ​អស្ចារ្យ​របស់ខ្លួន​ក្នុងជំនួប​ទល់នឹង Richard Gasquet សរុប ២១លើក​ឈ្នះ ១៩ចាញ់​តែ ២លើក​ប៉ុណ្ណោះ​។ ​ជ័យជំនះ​នេះ​លើក Federer ចំណាយ​ត្រឹម ៣សិត​លទ្ធផល​ពិន្ទុ ៧-៦(៧-១), ៦-១ និង ៦-៤​។ ​ជុំ​ទី៣ Federer នឹងត្រូវ​ជួប​ជាមួយ​កីឡា​ករលេខ២ ប្រចាំ​ចក្រភព​អង់គ្លេស Cameron Norrie ដែល​បាន​ឡើង​ជុំ​ទី៣ រឺ​វគ្គ ៣២នាក់​ចុង​ក្រោយនេះ​ជា​លើកដំបូង​។​ ​កីឡាករ​វ័យ ២៥ឆ្នាំ Cameron Norrie បាន​យកឈ្នះ​គូប្រកួត​មកពី​អូស្ត្រាលី​លំដាប់​លលេ​ខ ១៤៩ ពិភពលោក Alex Bolt លទ្ធផល ៦-៣, ៦-១ និង ៦-២​។

​​ចំណែក​ការប្រកួត​ផ្នែក​នារី​វិញ កីឡាការិនី​លេខ ១ ពិភពលោក Ashleigh Barty ក៏​ឆ្លង​ផុត​ជុំ​ទី២ ដែរ​ក្រោយ​ឈ្នះ​កីឡាការិនី​រុស្ស៊ី​វ័យ ២២ឆ្នាំ Anna Blinkova ៦-៤ និង ៦-៣ ដើម្បី​បន្ត​ជួប​ជាមួយ​កីឡាការិនី​ឆេ​ក Katerina Siniakova​ ស្រប​ពេលដែល​កីឡាការិនី​វ័យក្មេង​អាមេរិក Coco Gauff ក៏​ឆ្លង​ផុត​ជុំ​ទី២ ដែរ​ក្រោយ​ឈ្នះ​កីឡាការិនី​រុស្ស៊ី Elena Vesnina ៦-៤ និង ៦-៣​។ ​រីឯ​កីឡាការិនី​លំដាប់​លេខ៣ Elina Svitolina បាន​ធ្លាក់​ចេញពី​ការប្រកួត​ហើយ​ ក្រោយ​បរាជ័យ​បរាជ័យ​ក្រោម​ស្នាដៃ​កីឡា​ការិនី​ប៉ូឡូញ Magda Linette ៦-៣ និង ៦-៤ ធ្វើអោយ​កីឡាការិនី​ក្នុង​លំដាប់ Top ១០ នៅពេលនេះ​នៅសល់​តែ ៣​នាក់​ប៉ុណ្ណោះ​គឺ Ashleigh Barty, Aryna Sabalanca និង​ជើងឯក​ឆ្នាំ២០២០ Iga Swiatek៕

​អត្ថបទ​៖​នាង សុភា​វុ​ធ