ភ្នំពេញ៖ ស្ថានឯកអគ្គរាជទូតកម្ពុជា ប្រចាំសាធារណរដ្ឋកូរ៉េ បានចាប់ផ្តើមផ្តល់លិខិតឆ្លងដែនធម្មតា ដល់ប្រជាពលរដ្ឋ និងពលករខ្មែរដែលកំពុងរស់នៅ និងធ្វើការនៅសាធារណរដ្ឋកូរ៉េ បន្ទាប់ពីរាជរដ្ឋាភិបាល បានអនុញ្ញាឲ្យពួកគេបានធ្វើនៅទីនោះផ្ទាល់ មិនចាំបាច់ត្រឡប់មកធ្វើនៅកម្ពុជាវិញ ។

ក្នុងពេលផ្ដល់លិខិតឆ្លងដែនដល់ប្រជាពលរដ្ឋ និងពលករ នៅថ្ងៃទី៩ ខែកុម្ភៈ ឆ្នាំ២០២៤ លោកជំទាវ ជ្រឹង បុទុមរង្សី ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ មានប្រសាសន៍ថា នេះជាថ្ងៃទីមួយ នៃការផ្តល់នូវលិខិតឆ្លងដែន ដល់បងប្អូនពលរដ្ឋខ្មែរដែលកំពុងរស់នៅ និងធ្វើការងារនៅសាធារណរដ្ឋកូរ៉េ បន្ទាប់ពីពួកគេបានទៅធ្វើលិខិតឆ្លងដែនធម្មតា ដោយផ្ទាល់នៅស្ថានឯកអគ្គរាជទូតកម្ពុជា ប្រចាំនៅសាធារណរដ្ឋកូរ៉េ ចាប់ពីថ្ងៃទី១០ រហូតដល់ថ្ងៃទី១៤ ខែមករា ឆ្នាំ២០២៤កន្លងមក ។

លោកជំទាវ បានគូសបញ្ជាក់ថា រាជរដ្ឋាភិបាលកម្ពុជាអាណត្តិទី៧ ដឹកនាំដោយសម្តេច ធិបតី ហ៊ុន ម៉ាណែត តែងតែយកចិត្តទុកដាក់ជាប់ជាប្រចាំ ដល់ជីវភាពរស់នៅរបស់ពលរដ្ឋខ្មែរដែលកំពុងរស់នៅ និងធ្វើការនៅបរទេស ជាពិសេសនៅសាធារណរដ្ឋកូរ៉េ តាមរយៈការបង្ខិតការផ្តល់សេវាសាធារណៈឱ្យកៀកជិត នឹងបងប្អូនពលរដ្ឋខ្មែរយើង និងឆ្លើយតបឱ្យទាន់ពេលវេលាជូនដល់ពួកគេ ។ 

លោកជំទាវ ជ្រឹង បុទុមរង្សី បន្ថែមថា ជាក់ស្តែង សម្តេចធិបតី បានជួយជ្រោមជ្រែងឱ្យមានការរៀបចំធ្វើលិខិតឆ្លងដែន នៅស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ ពោលគឺសំដៅដល់ការកាត់បន្ថយចំណាយថវិកា និងពេលវេលាច្រើន ដោយបងប្អូនពលរដ្ឋខ្មែរ ពុំចាំបាច់ធ្វើដំណើរមកប្រទេសវិញ ដើម្បីស្នើសុំធ្វើលិខិតឆ្លងដែននោះឡើយ ។

ក្នុងពេលទៅទទួលលិខិតឆ្លងដែនធម្មតា ប្រជាពលរដ្ឋ និងពលករខ្មែរ មានការសប្បាយចិត្តយ៉ាងក្រៃលែង និងបានថ្លែងអំណរគុណដល់ សម្តេចធិបតី ហ៊ុន ម៉ាណែត ដែលបានជួយសម្របសម្រួលដល់នីតិវិធី នៃការធ្វើលិខិតឆ្លងដែន និងរៀបចំឱ្យមានការធ្វើលិខិតឆ្លងដែននៅសាធារណរដ្ឋកូរ៉េតែម្តង ។

បន្ថែមពីនេះ បងប្អូនពលរដ្ឋខ្មែរ ក៏បានអរគុណដល់មន្រ្តីស្ថានទូតកម្ពុជា និងមន្រ្តីអត្តសញ្ញាណកម្ម ក្រសួងមហាផ្ទៃ ដែលបានយកចិត្តទុកដាក់ និងខិតខំបំពេញតួនាទីយ៉ាងសកម្មក្នុងការផ្តល់សេវាសាធារណៈដល់ពួកគេ ទោះបីជាថ្ងៃចុងសប្តាហ៍ ដែលជាថ្ងៃឈប់សម្រាកក៏ដោយ ដើម្បីផ្តល់ភាពងាយស្រួលដល់បងប្អូនពលរដ្ឋខ្មែរ ដោយបងប្អូនពលរដ្ឋដែលកំពុងតែធ្វើការនៅសាធារណរដ្ឋកូរ៉េ ពុំចាំបាច់សុំច្បាប់ឈប់សម្រាកពីថៅកែរោងចក្រ ឬក្រុមហ៊ុនឡើយ ៕

អត្ថបទ ៖ បាន សុខរិទ្ធិ