តុលាការកំពូលរបស់ប្រទេសម៉ាឡេស៊ី នៅថ្ងៃសុក្រ (០៩ កុម្ភៈ) នេះបានប្រកាសដាក់ច្បាប់ឥស្លាមមួយចំនួនមិនស្របតាមរដ្ឋធម្មនុញ្ញ ដែលត្រូវបានអនុម័តដោយរដ្ឋ ខឺឡាន់តាន់ (Kelantan) នៅក្នុងការសម្រេចដ៏សំខាន់មួយដែលមិនធ្លាប់មាន និងអាចប៉ះពាល់ដល់ច្បាប់ សារៀ (Sharia) ស្រដៀងគ្នានៅក្នុងផ្នែកផ្សេងទៀតនៃប្រទេសដែលភាគច្រើនកាន់សាសនាឥស្លាមមួយនេះ។

ប្រទេសម៉ាឡេស៊ី មានប្រព័ន្ធច្បាប់ពីរផ្លូវដោយបែងចែកលើច្បាប់ព្រហ្មទណ្ឌ និងច្បាប់គ្រួសារ ដែលអនុវត្តចំពោះជនមូស្លីម ដែលកំពុងដើរស្របគ្នានឹងច្បាប់ផ្លូវលោក។ ច្បាប់ឥស្លាមត្រូវបានអនុម័តដោយនីតិបញ្ញត្តិរដ្ឋ ខណៈច្បាប់ផ្លូវលោកត្រូវបានអនុម័តដោយសភាម៉ាឡេស៊ី។

អាសនៈតុលាការសហព័ន្ធដែលមានសមាជិកប្រាំបួនរូប នៅក្នុងការសម្រេចដោយការគាំទ្រ ៨ សំឡេងទល់នឹង ១ សំឡេងបានប្រកាសច្បាប់ចំនួន ១៦ នៅក្នុងក្រមព្រហ្មទណ្ឌ សារៀ របស់រដ្ឋ ខឺឡាន់តាន់ «ទុកជាមោឃៈ និងមិនត្រឹមត្រូវ» រួមទាំងបទប្បញ្ញត្តិដែលប្រព្រឹត្តិអំពើអាសអាភាស ល្បែងស៊ីសង ការបៀតបៀនផ្លូវភេទ និងការប្រមាថដល់ទីកន្លែងគោរពបូជា៕