ក្រុមមនុស្សធម៌បាននិយាយថា ភាពអស់សង្ឃឹមកំពុងកើនឡើងក្នុងចំណោមគ្រួសារ នៅតំបន់ហ្កាហ្សា ខណៈជម្លោះរវាងអ៊ីស្រាអែល និងក្រុមហាម៉ាស ធ្វើឲ្យក្បួនរថយន្តជំនួយជួបការលំបាកក្នុងការផ្ដល់ស្បៀងអាហារ ទឹកស្អាត និងការផ្គត់ផ្គង់ផ្នែកវេជ្ជសាស្រ្តដល់អ្នកដែលរងផលប៉ះពាល់។

គួរបញ្ជាក់ថា សង្គ្រាមរវាងអ៊ីស្រាអែល និងក្រុមហាម៉ាស បានឈានចូលដល់ខែទី៥ ហើយ កាលពីថ្ងៃពុធ (ទី៧ ខែកុម្ភៈ)។ អ៊ីស្រាអែលបាននិងកំពុងវាយប្រហារតំបន់ហ្កាហ្សាស្ទ្រីប និងធ្វើការវាយលុកផ្លូវគោក នៅក្នុងយុទ្ធនាការសងសឹករបស់ខ្លួន ចាប់តាំងពីមានការវាយប្រហារដ៏គួរឲ្យភ្ញាក់ផ្អើលដោយក្រុមសកម្មប្រយុទ្ធហាម៉ាស កាលពីថ្ងៃទី៧ ខែតុលាឆ្នាំមុន។ ជាង ៨០ភាគរយនៃចំនួនប្រជាជនរបស់ដែនដីនេះ ដែលមានប្រហែល ១,៩លាននាក់ ត្រូវផ្លាស់ទីលំនៅ ក្នុងតំបន់ហ៊ុមព័ទ្ធនេះ ហើយភាគច្រើននៃប្រជាជនទាំងនោះស្នាក់នៅក្នុងជំរកដែលចង្អៀតតាន់តាប់។

លោក Ajith Sunghay ប្រធានការិយាល័យសិទ្ធិមនុស្សរបស់អង្គការសហប្រជាជាតិប្រចាំដែនដីកាន់កាប់ប៉ាឡេស្ទីនបាននិយាយថា ស្ថានភាពនេះគឺ «ធ្ងន់ធ្ងរណាស់» ខណៈដែលការប្រយុទ្ធគ្នាបន្តមានឥតឈប់។លោកបានប្រាប់កម្មវិធីព័ត៌មាន Asia First របស់ប្រព័ន្ធផ្សព្វផ្សាយ CNA កាលពីថ្ងៃពុធ (ទី៧ ខែកុម្ភៈ) ថា «ការលំបាក គឺកាន់តែធ្ងន់ធ្ងរទៅ។ ដូច្នេះ អ្វីដែលមាននៅពេលនេះ គឺភាពអស់សង្ឃឹមរបស់ប្រជាជន ដោយមានតម្រូវការជំនួយមនុស្សធម៌យ៉ាងធំធេង។ ប្រជាជននៅនេះហត់នឿយ ស្រេកឃ្លាន និងខកចិត្ត»។

បើយោងតាមអង្គការសហប្រជាជាតិ (UN) បានឲ្យដឹងថា ចាប់តាំងពីជម្លោះនេះចាប់ផ្ដើមផ្ទុះឡើង មនុស្សប្រហែល ១០០.០០០នាក់ហើយ នៅតំបន់ហ្កាហ្សា ត្រូវបានសម្លាប់ រងរបួស ឬបាត់ខ្លួន។ ប្រមុខ UN លោក Antonio Guterres បានព្រមានកាលពីថ្ងៃពុធថា ពិភពលោកកំពុងឈានចូលដល់ «យុគសម័យវឹកវរ» ដោយក្រុមប្រឹក្សាសន្តិសុខដែលមានការខ្វែងគំនិតយ៉ាងខ្លាំង មិនអាចដោះស្រាយបញ្ហាសំខាន់ៗ ក្នុងនោះរួមទាំងសង្គ្រាមអ៊ីស្រាអែល និងក្រុមហាម៉ាសនេះផងដែរ។

ក្រុមមនុស្សធម៌បាននិងកំពុងទាមទារឲ្យមានបទឈប់បាញ់ ដោយនិយាយថា នេះគឺជាមធ្យោបាយតែមួយគត់ ដើម្បីបំពេញតម្រូវការរបស់អ្នកដែលរងផលប៉ះពាល់។ តែនៅថ្ងៃពុធនោះ នាយករដ្ឋមន្ត្រីអ៊ីស្រាអែល លោក Benjamin Netanyahu បានច្រានចោលការទាមទាររបស់ក្រុម Hamas សម្រាប់បទឈប់បាញ់ ហើយបានបញ្ជាឲ្យកងទ័ពត្រៀមខ្លួន ដើម្បីផ្លាស់ទៅកាន់ទីក្រុង Rafah៕