អង្គការសហប្រជាជាតិ បាននិយាយកាលពីថ្ងៃសុក្រថា ជនស៊ីវិលប៉ាឡេស្ទីននៅ ទីក្រុង Rafah ក្នុងតំបន់ ហ្កាហ្សា ចាំបាច់ត្រូវបានការពារ ប៉ុន្តែមិនគួរមានការភៀសខ្លួនដោយបង្ខំនោះទេ បន្ទាប់ពីអ៊ីស្រាអែល បានចាប់ផ្តើមរៀបចំផែនការជម្លៀសខ្លួន ដើម្បីចូលទៅកម្ចាត់ក្រុមហាម៉ាស់នៅក្នុងតំបន់នេះ។ អ្នកនាំពាក្យអង្គការសហប្រជាជាតិ លោក Stephane Dujarric បាននិយាយកាលពីថ្ងៃសុក្រថា យើងមានការព្រួយបារម្ភយ៉ាងខ្លាំងអំពីជោគវាសនារបស់ជនស៊ីវិលនៅទីក្រុង Rafah។ លោក Dujarric បាននិយាយថា អ្វីដែលច្បាស់នោះ គឺថាប្រជាជនត្រូវតែបានការពារ ប៉ុន្តែយើងក៏មិនចង់ឃើញការភៀសខ្លួនដោយបង្ខំ ការភៀសខ្លួនទ្រង់ទ្រាយធំដោយបង្ខំរបស់ប្រជាជន ដែលផ្ទុយទៅនឹងឆន្ទៈរបស់ពួកគេ។ យើងនឹងមិនគាំទ្រការភៀសខ្លួនដោយបង្ខំ ដែលផ្ទុយនឹងច្បាប់អន្តរជាតិនោះទេ។ នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាឱ្យយោធារបស់ប្រទេស កាលពីថ្ងៃសុក្រ រៀបចំផែនការ ដើម្បីជម្លៀសជនស៊ីវិលប៉ាឡេស្ទីនចេញពីទីក្រុង Rafah ភាគខាងត្បូងតំបន់ហ្កាហ្សា និងកម្ចាត់ក្រុមអ្នកប្រយុទ្ធហាម៉ាសនៅទីនោះ។ ជាងពាក់កណ្តាលនៃប្រជាជន ២,៣ លាននាក់របស់តំបន់ហ្កាហ្សា កំពុងជ្រកកោននៅក្នុងទីក្រុង Rafah ដែលពួកគេភាគច្រើន បានឈរនៅរបងព្រំដែនជាមួយប្រទេសអេហ្ស៊ីប និងរស់នៅក្នុងតង់បណ្តោះអាសន្ន។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ បាននិយាយកាលពីថ្ងៃសុក្រថា ដង់ស៊ីតេដែលមិនធ្លាប់មានពីមុនមកនៃចំនួនប្រជាជនទីក្រុង Rafah ធ្វើឱ្យវាស្ទើរតែមិនអាចការពារជនស៊ីវិលបាននៅក្នុងករណីនៃការវាយប្រហារតាមជើងគោក។

នៅក្នុងការសងសឹក អ៊ីស្រាអែលបានបើកការវាយប្រហារយោធាលើតំបន់ហ្កាហ្សា ដែលអាជ្ញាធរសុខាភិបាលបាននិយាយថា បានសម្លាប់ប្រជាជនប៉ាឡេស្ទីនជាង ២៧.០០០នាក់ ដោយមានសាកសពរាប់ពាន់នាក់ទៀតត្រូវបានគេបារម្ភថា បានបាត់បង់ក្នុងពេលមានមានការបំផ្លាញ។