សេតវិមាន កាលពីថ្ងៃសុក្រ បានរិះគន់របាយការណ៍របស់ទីប្រឹក្សាពិសេស ដែលបានចោទប្រកាន់ប្រធានាធិបតី លោក Joe Biden ថា កំពុងទទួលរងភាពភ្លេចភ្លាំង។ លោក Biden មិនប្រឈមមុខទៅនឹងការចោទប្រកាន់ព្រហ្មទណ្ឌនោះទេ បន្ទាប់ពីការស៊ើបអង្កេតរយៈពេល ១៥ ខែលើការចាត់ចែងឯកសារសម្ងាត់បំផុតរបស់លោក ប៉ុន្តែការពណ៌នារបស់លោក Robert Hur ថាលោកជា បុរសចំណាស់មានការចងចាំខ្សោយ អាចធ្វើឲ្យប៉ះពាល់ដល់លោក ក្នុងរឿងនយោបាយ។

អ្នកនាំពាក្យសេតវិមានលោក Ian Sams បានលើកសំណួរអំពីការវិនិច្ឆ័យរបស់លោក Hur កាលពីថ្ងៃសុក្រដោយចាត់ទុករបាយការណ៍នេះថា «មិនសមស្រប និងពុំមានសុភនិច្ឆ័យ»។ ពួកគេបាននិយាយមើលងាយនីតិរដ្ឋសម្រាប់គោលបំណងនយោបាយ នៅពេលដែលការសន្និដ្ឋានដែលជៀសមិនរួចគឺថាការពិត និងភ័ស្តុតាង មិនគាំទ្រដល់ការចោទប្រកាន់ណាមួយនោះទេ។

ជាមួយគ្នានេះ អនុប្រធានាធិបតី លោកស្រី Kamala Harris កាលពីថ្ងៃសុក្រ បានចាត់ទុករបាយការណ៍នេះថា ជាហេតុផលនយោបាយ។

លោក Biden ខ្លួនលោកផ្ទាល់ បាននិយាយវាយបកវិញកាលពីថ្ងៃព្រហស្បតិ៍ ដោយការពារការចងចាំរបស់លោក ហើយថែមទាំងបញ្ចេញកំហឹងចំពោះការអត្ថាធិប្បាយរបស់ទីប្រឹក្សាពិសេស ដែលថាលោកមិនអាចចាំថ្ងៃស្លាប់របស់កូនប្រុសលោក។

លោក Biden បានផ្តល់បទសម្ភាសន៍ថា របាយការណ៍របស់ទីប្រឹក្សាពិសេស គឺផ្អែកលើថ្ងៃទី ៨ និងទី ៩ ខែតុលា បន្ទាប់ពីបានរៀបចំការឆ្លើយតបរបស់សហរដ្ឋអាមេរិក ចំពោះការវាយប្រហាររបស់ក្រុមហាម៉ាសនៅថ្ងៃទី ៧ ខែតុលាលើប្រទេសអ៊ីស្រាអែល។ លោក Sams បានប្រកាសថា លោក Biden បានបញ្ជាឱ្យបង្កើតក្រុមការងារមួយ ដើម្បីពិនិត្យមើលការដោះស្រាយព័ត៌មានសម្ងាត់បំផុត ក្នុងអំឡុងពេលអន្តរកាលរវាងប្រធានាធិបតី និងអ្នកបន្តតំណែងរបស់លោក។