យោងតាមអាជ្ញាធរបានឲ្យដឹងថា មានឧបទ្ទវហេតុផ្ទុះឆេះមួយនៅលើផ្លូវហាយដ៏មមាញឹក ក្នុងរដ្ឋ Florida សហរដ្ឋអាមេរិក បន្ទាប់ពីយន្តហោះដឹកអ្នកដំណើរឯកជន ១គ្រឿង ដែលមានមនុស្សចំនួន ៥នាក់បានធ្លាក់ និងបានបុកជាមួយរថយន្តនៅដី កាលពីថ្ងៃសុក្រ (ទី៩ ខែកុម្ភៈ) ដោយហេតុការណ៍នោះបានសម្លាប់មនុស្សយ៉ាងហោចណាស់ ២នាក់។

វីដេអូពីកន្លែងកើតហេតុដែលបានចែករំលែកនៅលើបណ្ដាញសង្គមបង្ហាញឲ្យឃើញពីយន្តហោះ ដែលត្រូវបានអណ្ដាតភ្លើង និងផ្សែងរុំជិត បន្ទាប់ពីយន្តហោះនោះបានធ្លាក់នៅលើផ្លូវ Interstate 75 ក្បែរទីក្រុង Naples នាភាគនិរតីនៃឈូងសមុទ្រ Florida។

ក្រុមប្រឹក្សាសុវត្ថិភាពដឹកជញ្ជូនជាតិ (NTSB) បានឲ្យដឹងនៅក្នុងសេចក្តីថ្លែងការណ៍ថា យន្តហោះពាណិជ្ជកម្ម Bombardier Challenger 600 ដែលបានហោះចេញពីរដ្ឋ Ohio បានជិតទៅដល់អាកាសយានដ្ឋាន Naples ហើយ នៅពេលដែលអាកាសយានិកបានប្រាប់តាមវិទ្យុទាក់ទងថា ម៉ាស៊ីន Turbofan របស់យន្តហោះទាំង២ មានបញ្ហា។

អ្នកនាំពាក្យការិយាល័យតម្រួតតំបន់ Collier បាននិយាយថា យ៉ាងហោចណាស់មនុស្ស ២នាក់ បានស្លាប់នៅក្នុងឧបទ្ទវហេតុនេះ ប៉ុន្តែគេមិនទាន់ដឹងភ្លាមៗនោះទេថា តើអ្នករងគ្រោះនោះ ជាអ្នកនៅក្នុងយន្តហោះ ឬនៅក្នុងរថយន្តដែលយន្តហោះបានបុក៕