នគរបាលក្នុងប្រទេសថៃ បាននិយាយថា អ្នកដំណើរជនជាតិកាណាដាម្នាក់ត្រូវបានចោទប្រកាន់ កាលពីថ្ងៃព្រហស្បតិ៍ (ទី៨ ខែកុម្ភៈ) ជុំវិញការបើកទ្វារយន្តហោះរបស់ក្រុមហ៊ុនអាកាសចរណ៍ Thai Airways ដែលកំពុងរៀបចំហោះឡើង នៅទីក្រុង Chiang Mai (ឈៀងម៉ៃ)។

បើតាមប្រព័ន្ធផ្សព្វផ្សាយរបស់ថៃ បានឲ្យដឹងថា ការរំខាននេះបានប៉ះពាល់ជើងហោះហើររាប់សិបវ៉ុល នៅព្រលានយន្តហោះ។ មេធាវីរបស់អ្នកដំណើររូបនោះ គឺលោក Jirawat Yarnkiatpakdee បានប្រាប់បណ្ដាញសារព័ត៌មានក្នុងស្រុកថា កូនក្តីរបស់ខ្លួន បានសារភាពថា ពិតជាបានបើកទ្វារយន្តហោះនោះមេន ដោយសារលោកគិតថា លោកស្ថិតក្នុងគ្រោះថ្នាក់។

យោងតាមទូរទស្សន៍ក្នុងស្រុក TPBS បានឲ្យដឹងថា អ្នកដំណើររូបនោះបានស្វែងរកការព្យាបាលចំនួន ២ដង និងប្រើប្រាស់ថ្នាំជាច្រើនគ្រាប់ ប៉ុន្តែអ្នកស៊ើបអង្កេតមិនបានបង្ហាញពីជំងឺជាក់លាក់ណាមួយឡើយ។

ក្រុមហ៊ុនអាកាសចរណ៍ Thai Airways បាននិយាយថា បន្ទាប់ពីការត្រួតពិនិត្យ យន្តហោះនេះអាចចេញដំណើរដោយសុវត្ថិភាព ជាមួយនឹងអ្នកដំណើរ និងអាកាសយានិកទាំងអស់៕