ភ្នំពេញ៖ អភិបាលរាជធានីភ្នំពេញ បានឱ្យដឹងថា អាជ្ញាធរបានប្រមូលសំរាមចេញពីក្រុងភ្នំពេញប្រមាណពីរពាន់តោនក្នុងមួយថ្ងៃ ខណៈកម្មករស៊ិនទ្រីបន្តធ្វើកូដកម្ម ប៉ុន្តែ ឯកឧត្ដម បានបញ្ជាក់ថា អាជ្ញាធរមិនរំពឹងកម្មករប្រមូលសំរាមទេ ប្រសិនមិនចូលធ្វើការ ព្រោះក្រុមហ៊ុនថ្មីនឹងចេញធ្វើការឆាប់ៗខាងមុខ។
ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ បានបញ្ជាក់ឲ្យដឹងថា មកដល់ពេលនេះ ទាំង១៤ខណ្ឌ និងសង្កាត់ទាំង១០៥ បាននឹងកំពុងខិតខំទាំងយប់ ទាំងថ្ងៃ ដើម្បីធ្វើសកម្មភាពប្រមូលសំរាមនៅក្នុងរាជធានីភ្នំពេញ ដែលមកដល់ពេលនេះក្នុងមួយថ្ងៃអាជ្ញាធរប្រមូលសំរាមបាន ប្រមាណ ២០០០តោន ខណៈដែលនៅរាជធានីភ្នំពេញ ក្នុងមួយថ្ងៃមានសំរាមចំនួន ២៨៦៥តោន។
មានន័យថា រដ្ឋបាលរាជធានីភ្នំពេញអាចគ្រប់គ្រងការប្រមូលសំរាមបានមួយកម្រិតធំហើយ។ ឯកឧត្ដម ឃួង ស្រេង ជឿជាក់ថា មិនយូរទេ ការប្រមូលសំរាមនឹងលែងជាបញ្ហា បើទោះបីកម្មករស៊ិនទ្រី ធ្វើកូដកម្មមិនប្រមូលសំរាមក៏ដោយ។
ឯកឧត្ដម ឃួង ស្រេង បានបញ្ជាក់ផងដែរថា កិច្ចការងារប្រមូលសំរាមគឺបានគិតគូរតាំងពីឆ្នាំ២០១៩មក ដោយយើង បានចែកម៉ូតូកង់បីសំរាប់ដឹកសំរាមនៅតាមបណ្ដាខណ្ឌទាំង១៤ និងសង្កាត់ទាំង១០៥ ជាមួយនឹងការទិញរថយន្តដឹកសំរាមចំនួន ៧០គ្រឿង ដើម្បីដឹកជញ្ជូនសំរាមទៅចាក់ទីលានផងដែរ ហើយមកដល់ពេលនេះ ទាំងអគ្គស្នងការនគរបាលជាតិ ទាំងបញ្ជាការកងរាជអាវុធហត្ថ ក៏បានសន្យាបញ្ជូនកងកម្លាំងប្រដាប់អាវុធទាំងពីរភេទនេះ មួយពាន់នាក់ មកជួយលើការងារដឹកជញ្ជូន និងប្រមូលសំរាមនៅរាជធានីភ្នំពេញផងដែរ។
ឯកឧត្ដម ឃួង ស្រេង ក៏បានអំពាវនាវដល់ប្រជាពលរដ្ឋទាំងអស់ មេត្តាទុកដាក់ វេចខ្ចប់សំរាមឲ្យបានល្អ កុំយកទៅបោះចោលនៅតាមទីសាធារណៈ អាចយកទៅដាក់នៅដេប៉ូ ចាក់សំរាមដែលរៀបចំឡើងដោយអាជ្ញាធរខណ្ឌ នៅក្នុងរាជធានីភ្នំពេញ ការធ្វើបែបនេះនិងជួយសម្រួលការងារច្រើនសម្រាប់ក្រុមការងារដឹកសំរាម ជញ្ជូនសំរាម៕ អត្ថបទ៖ ប្រាក់ វ៉ាន់ដា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
