ប្រធានាធិបតីអាហ្សង់ទីនលោក Javier Milei កាលពីថ្ងៃសុក្រ (ទី៩ ខែកុម្ភៈ) បានអំពាវនាវឲ្យមន្ត្រីរដ្ឋាភិបាល ២រូបលាលែងពីតំណែង ដោយនិយាយថា លោកត្រូវការការប្តេជ្ញាចិត្តខ្លាំងក្លាជាងនេះ ចំពោះរបៀបវារៈរបស់លោក បន្ទាប់ពីសមាជបានបដិសេធកញ្ចប់កំណែទម្រង់របស់លោក នៅដើមសប្តាហ៍នេះ។

អ្នកកំណត់ខ្លួនឯងជាអ្នកមូលធននិយមលោក Milei ដែលបានចូលកាន់តំណែងកាលពីខែធ្នូ បានអំពាវនាវឲ្យមានការចុះចេញពីតំណែង ចំពោះរដ្ឋមន្ត្រីក្រសួងរ៉ែ លោកស្រី Flavia Royon និងលោក Osvaldo Giordano ដែលជាប្រធានទីភ្នាក់ងារធានារ៉ាប់រងសង្គម ANSES របស់ប្រទេសនេះ។

ការិយាល័យរបស់លោក Milei បានឲ្យដឹងនៅក្នុងសេចក្តីថ្លែងការណ៍តាមបណ្ដាញសង្គម X ដោយអំពាវនាវឲ្យមានការលាលែងពីតំណែងថា៖ «វិបត្តិសេដ្ឋកិច្ចដែលបានទទួលមរតក និងពេលវេលាប្រវត្តិសាស្ត្របច្ចុប្បន្ន ទាមទារឲ្យមន្ត្រីសាធារណៈមានការប្តេជ្ញាចិត្ត ចំពោះការធ្វើទំនើបកម្ម ធ្វើឲ្យមានភាពសាមញ្ញ និងការបន្ថយការិយាធិបតេយ្យរបស់រដ្ឋ»។

ការបដិសេធរបស់សភាលើសេចក្ដីស្នើច្បាប់ចម្រុះ កាលពីថ្ងៃអង្គារ (ទី៦ ខែកុម្ភៈ) បានបង្ហាញពីការរាំរាំងដ៏ធំ សម្រាប់លោក Milei ដែលបានចោទប្រកាន់សមាជិកសភាគណបក្សប្រឆាំងថា «ក្បត់»។ លោកបានប្រកែកថា ច្បាប់នេះដែលមានរួមបញ្ចូលទាំងបទប្បញ្ញត្តិ ដើម្បីអនុញ្ញាតឲ្យធ្វើឯកជនភាវូបនីយកម្មនៃអង្គភាពរដ្ឋ និងអំណាចប្រធានាធិបតីបន្ថែមទៀតនោះ គឺចាំបាច់ដើម្បីជួយសង្គ្រោះអាហ្សង់ទីនពីវិបត្តិសេដ្ឋកិច្ច។

លោក Giordano បានឲ្យដឹងនៅលើបណ្ដាញសង្គម X ថា លោកសោកស្តាយដែលមិនមានពេលវេលាគ្រប់គ្រាន់ដើម្បីអនុវត្តការផ្លាស់ប្តូរដែលបានគ្រោងទុក នៅ ANSES។ ចំណែកលោកស្រី Royon ដែលធ្លាប់បម្រើការជាមន្ត្រីនៅក្រោមរដ្ឋាភិបាលមុនដែលប្រកាន់ទ្រឹស្ដីពែកសូនិសនិយមនោះ មិនបានឆ្លើយតបភ្លាមៗជាសាធារណៈ ឬចំពោះសំណើសុំការអត្ថាធិប្បាយរបស់សារព័ត៌មាន Reuters នោះឡើយ៕