ភ្នំពេញ៖ កម្ពុជាសម្រេចការចាក់វ៉ាក់សាំងជូនប្រជាពលរដ្ឋបានជិត ៤៤ភាគរយ នៅក្នុងយុទ្ធនាការចាក់វ៉ាក់សាំងទូទាំងប្រទេសតាំងខែកុម្ភៈកន្លងមក នេះបើតាមរបាយការណ៍ចេញដោយក្រសួងសុខាភិបាលនៅយប់នេះ។
របាយការណ៍របស់គណៈកម្មការចំពោះកិច្ចការចាក់វ៉ាក់សាំង បានឱ្យដឹងថា ប្រជាពលរដ្ឋជាង ៤លាន ៣៩ម៉ឺននាក់ហើយ បានទទួលវ៉ាក់សាំងយ៉ាងហោចណាស់ដូសទី១រួចរាល់ នៅក្នុងយុទ្ធនាការចាក់វ៉ាក់សាំងទូទាំងប្រទេសចាប់ពីថ្ងៃទី១០ ខែកុម្ភៈ រហូតដល់ថ្ងៃទី០២ ខែកក្កដានេះ។
បើតាមតួលេខដដែលនេះ ប្រជាពលរដ្ឋដល់ទៅជាង ៣លាន ១៦ម៉ឺននាក់ហើយ បានទទួលវ៉ាក់សាំងទាំងពីរដូសរួចរាល់ហើយនៅក្នុងចន្លោះពេលនេះ។
តួលេខចេញដោយក្រសួងសុខាភិបាល បង្ហាញថា យុទ្ធនាការចាក់វ៉ាក់សាំងទូទាំងប្រទេសសម្រេច ៤៣.៩២ភាគរយហើយ បើធៀបទៅនឹងចំនួនប្រជាជន ១០លាននាក់ ដែលរាជរដ្ឋាភិបាលបានកំណត់សម្រាប់ទទួលបានវ៉ាក់សាំងបង្ការជំងឺកូវីដ-១៩នៅក្នុងឆ្នាំ២០២១នេះ។
ក្រសួងសុខាភិបាលបានឱ្យដឹងផងដែរថា ប្រជាពលរដ្ឋជាង ៤លាន ៤៥ម៉ឺននាក់ បានស្ម័គចិត្រចុះឈ្មោះចាក់វ៉ាក់សាំងបង្ការជំងឺកូវីដ-១៩នៅក្នុងរយៈពេលជិត ៦ខែកន្លងមកនេះ ប៉ុន្តែ ក្រសួងបញ្ជាក់ថា ពលរដ្ឋជិត ៦ម៉ឺននាក់ មិនត្រូវបានអនុញ្ញាតឱ្យចាក់វ៉ាក់សាំងនោះឡើយដោយសារបញ្ហាសុខភាព។
កម្ពុជាបានចាប់ផ្ដើមយុទ្ធនាការចាក់វ៉ាក់សាំងបង្ការជំងឺកូវីដ-១៩ជូនប្រជាពលរដ្ឋចាប់តាំងពីថ្ងៃទី១០ ខែកុម្ភៈកន្លងមក ដោយបានផ្ដល់វ៉ាក់សាំងបីប្រភេទជូនប្រជាពលរដ្ឋ មានវ៉ាក់សាំងស៊ីណូហ្វាម និងវ៉ាក់សាំងស៊ីណូវ៉ាក់ ដែលត្រូវបានផលិតឡើងនៅក្នុងប្រទេសចិន និងវ៉ាក់សាំងកូវីហ្ស៊ែល (CoviShield)ដែលត្រូវបានផលិតឡើងនៅក្នុងប្រទេសឥណ្ឌាក្រោមការអនុញ្ញាតរបស់ក្រុមហ៊ុនផលិតវ៉ាក់សាំង AstraZeneca របស់អង់គ្លេស៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
