សម្តេចវិបុលសេនាភក្តី សាយ ឈុំ ប្រធានព្រឹទ្ធសភាកម្ពុជា បានណែនាំដល់លោកជំទាវបណ្ឌិត សឿង រដ្ឋចាវី ឯកអគ្គរាជទូតកម្ពុជាថ្មីប្រចាំនៅប្រទេសចិន ត្រូវខិតខំ​ធ្វើ​យ៉ាង​ណាជួយ​ផ្សព្វផ្សាយ​អំពី​សភាពការណ៍ជាក់ស្តែងនៅ កម្ពុជាបន្ថែមទៀត ដើម្បីជាការទាក់ទាញនូវអ្នកវិនិយោគ និង​អ្នក​ទេសចរ​ចិនឲ្យមកវិនិយោគ និងមកកំសាន្តនៅប្រទេសកម្ពុជាឲ្យកាន់តែច្រើនបន្ថែមទៀត។

ក្នុងឱកាសអនុញ្ញាតឲ្យលោកជំទាវ សឿង រដ្ឋចាវី ឯកអគ្គរាជទូតកម្ពុជាថ្មី ប្រចាំនៅប្រទេសចិន ចូល​ជួប​សម្តែងការគួរសម និងទទួលអនុសាសន៍មួយចំនួន មុនពេល​អញ្ជើញ​ទៅ​បំពេញ​បេសកកម្ម​ការ​ទូតប្រចាំនៅសាធារណរដ្ឋប្រជាមានិតចិន នាថ្ងៃទី១២ ខែកុម្ភៈ ឆ្នាំ២០២៤នេះ សម្តេចវិបុល​សេនាភក្តី សាយ ឈុំ បានលើកឡើងថា «ក្នុងអំឡុកពេលបេសកកម្មការងាររបស់ខ្លួនត្រូវផ្សព្វផ្សាយ និងបកស្រាយពន្យ​ល់​អំពី​សភាព​ការណ៍​ពិត និងការអនុវត្តនូវលទ្ធិប្រជាធិបតេយ្យនៅកម្ពុជាជូនដល់សាធារណៈមតិជាតិ និង​អន្តរជាតិ ជាពិសេសនៅប្រទេសដែលកំពុងបំពេញភារកិច្ចនៅទីនោះ។ ត្រូវផ្តល់ព័​ត៌មាន​ឱ្យ​បាន​រហ័ស​ចំពោះ​សភាពការណ៍ជាក់ស្តែងរបស់កម្ពុជា និងត្រូវយកចិត្ត​ទុក​ដាក់​ផ្សព្វ​ផ្សាយ​ក្នុង​ការ​ទាក់​ទាញ​​វិនិយោគិន និងភ្ញៀវទេសចរចិនមកទស្សនាកម្ពុជាឲ្យបានកាន់តែច្រើន និងត្រូវ​សកម្ម​ផ្សព្វផ្សាយ​អំពី​វប្បធម៌ប្រពៃណី និងទំនៀមទំលាប់ដ៏ល្អរបស់កម្ពុជាយើងជាដើម»។

 សម្តេចប្រធានព្រឹទ្ធសភា ក៏បានផ្តាំផ្ញើចំពោះ​លោក​ជំទាវ​បណ្ឌិត​ឯក​អគ្គ​រាជ​ទូត​ត្រូវ​យក​ចិត្ត​ទុក​ដាក់​ពង្រឹង​ពង្រីកទំនាក់ទំនង និងកិច្ចសហប្រតិបត្តិការឱ្យបានល្អប្រសើរដើម្បីផលប្រយោជន៍ ទៅ​វិញ​ទៅ​មករវាងកម្ពុជាជាមួយ ចិនទាំងពេលបច្ចុប្បន្ន និងតទៅអនាគតយូរអង្វែងផងដែរ ហើយ​ដើម្បី​ស​ម្រេចគោលបំណងនេះ ត្រូវយក​ចិត្តទុក​ដាក់​កសាង​ទំនាក់​ទំនង​ល្អ​ជាមួយ​នឹង​បណ្តា​ស្ថាប័ន និងជាមួយប្រជាជននៃសាធារណរដ្ឋប្រជាមានិតចិនឱ្យបានល្អប្រសើរ។ ទន្ទឹមនឹ​ង​នេះ​ត្រូវ​យក​ចិត្ត​ទុកដាក់គិតគូរដល់ផលប្រយោជន៍របស់ប្រជាពលរដ្ឋខ្មែរ និងពលករខ្មែរ​ដែល​កំពុង​រស់​នៅ​ប្រកប​អាជីវកម្ម និងធ្វើការងារនៅសាធារណរដ្ឋប្រជាមានិតចិន។ ជានិច្ចកាលត្រូវ​បង្កើន​កិច្ច​សហប្រតិបត្តិការ​ល្អជាមួយនឹងឯកអគ្គរាជទូត ឯកអគ្គរដ្ឋទូត នៃប្រទេសនានាប្រចាំ​នៅ​សាធារណ​រដ្ឋ​ប្រជា​មានិតចិន។

 ថ្លែងនៅក្នុងកិច្ចជំនួបនោះដែរ លោកជំទាវ សឿង រដ្ឋចាវី បានប្តេជ្ញាចំពោះ​មុខ​សម្តេច​ប្រធាន​ព្រឹទ្ធ​សភា​ថានឹងខិតខំបំពេញភារកិច្ចការទូតរបស់ខ្លួនប្រកបដោយស្មារតីទទួលខុសត្រូវខ្ពស់ ឱ្យបាន​សក្តិសមជាតំណាងឲ្យកម្ពុជា នៅលើឆាកអន្តរជាតិ និងខិតខំ​អនុវត្ត​តាម​អនុសាសន៍​ណែនាំ របស់សម្តេចប្រធានព្រឹទ្ធសភា និងខិតខំផ្សព្វផ្សាយអំពីវឌ្ឍនភាព និងការ​រីក​ចម្រើន​របស់​ប្រទេស​ជាតិ ពង្រឹងពង្រីកទំនាក់ទំនង​សហប្រតិបត្តិការ​ល្អ​ប្រសើរ​ជាមួយ​នឹង​សាធារណ​រដ្ឋ​ប្រជា​មានិតចិន និងបណ្តាអង្គទូតនានាប្រចាំនៅប្រទេស ព្រមទាំងខិតខំទាក់ទាញវិនិយោគិន និង​អ្នក​ទេសចរ​ឱ្យ​មកកម្ពុជាបានកាន់តែច្រើន ដើម្បីរួមចំណែកអភិវឌ្ឍប្រទេសជាតិ និងលើក​កម្ពស់​កិត្យា​នុភាព​ជាតិ​នៅ​ក្នុងក្របខ័ណ្ឌតំបន់ និងលើពិភពលោកផងដែរ៕​ អត្ថបទ៖ បាន ចក់