កោះតៃវ៉ាន់៖ គណៈកម្មការរៀបចំការបោះឆ្នោតបាននិយាយថា កោះតៃវ៉ាន់នឹងពន្យារពេលការបោះឆ្នោតប្រជាមតិដែលកំណត់នៅចុងខែក្រោយ ដោយសារការព្រួយបារម្ភអំពីការរីករាលដាលនៃវីរុស COVID-19 ខណៈរដ្ឋាភិបាលទប់ស្កាត់ការផ្ទុះឡើងការឆ្លងថ្មី នៅទីផ្សារអាហារក្នុងក្រុងតៃប៉ិ។
កោះតៃវ៉ាន់បានដោះស្រាយជាមួយនឹងការឆ្លងជាចង្កោមក្នុងសហគមន៍ ចាប់តាំងពីពាក់កណ្តាលខែឧសភា ប៉ុន្តែចំនួននៃការឆ្លងបានចាប់ផ្តើមមានស្ថិរភាព នៅក្នុងប៉ុន្មានសប្តាហ៍ថ្មីៗនេះហើយនៅតែមានការឆ្លងកំរិតទាប។ គណៈកម្មការរៀបចំការបោះឆ្នោតរបស់កោះតៃវ៉ាន់បាននិយាយថា ការបោះឆ្នោតប្រជាមតិដែលគ្រោងធ្វើនៅថ្ងៃទី២៨ ខែសីហា នឹងត្រូវពន្យារពេលរហូតដល់ថ្ងៃទី១៨ ខែធ្នូដោយសារស្ថានភាពនៃវីរុស Covid-19។ លោក Lee Chin-yung ប្រធានគណៈកម្មការបាននិយាយថា ដោយសារតែថ្ងៃបោះឆ្នោតប្រជាមតិនឹងក្លាយជាថ្ងៃធ្វើដំណើរ និងការជួបជុំប្រជាជនច្រើនបំផុតរបស់កោះ ក្នុងពេលនៃការរីករាលដាលនៃជំងឺរាតត្បាត កោះតៃវ៉ាន់នឹងចៀសវាងផលវិបាកធ្ងន់ធ្ងរ នៃការផ្ទុះឡើងពីមនុស្សដែលមកជួបជុំគ្នា។
រដ្ឋមន្ត្រីក្រសួងសុខាភិបាល លោក Chen Shih-chung បាននិយាយថា ការផ្ទុះឡើងថ្មីនៃវីរុសនៅទីផ្សារត្រូវបានបិទរយៈពេល ៣ថ្ងៃមកហើយ ហើយទំនងជាមានការឆ្លងបន្ថែមទៀតដែលត្រូវបានបញ្ជាក់ នៅពេលលទ្ធផលនៃការធ្វើតេស្តបានចេញមក។ រដ្ឋមន្ត្រីសុខាភិបាលនិយាយថា យើងបានបន្តការធ្វើតេស្ត និងបានប្រកាសករណីក្នុងស្រុកថ្មីចំនួន ៥៧ករណី ប៉ុន្តែបាននិយាយថា ៤១ករណីនៅផ្សារនេះមិនទាន់ត្រូវបានរាប់បញ្ចូលជាផ្លូវការសរុបនៅឡើយទេ។ ផ្សារនេះស្ថិតនៅក្នុងស្រុក Wanhua របស់ក្រុងតៃប៉ិ ដែលជាចំណុចក្តៅមួយដែលមានការឆ្លងដំបូងក្នុងខែឧសភា។ ចំនួនសរុបនៃការឆ្លងនៅកោះតៃវ៉ាន់មានចំនួន ១៤.៩១១ករណីចាប់តាំងពីការរាតត្បាតវីរុស និងមានអ្នកស្លាប់ចំនួន ៦៧៦នាក់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
