សមាជិកគណបក្សសាធារណរដ្ឋមួយចំនួនរបស់អតីតប្រធានាធិបតីអាមេរិក ដូណាល់ ត្រាំ (Donald Trump) កាលពីថ្ងៃអាទិត្យ (១១ កុម្ភៈ) បានរិះគន់លោក ត្រាំ ដោយសារលោកបាននិយាយថាខ្លួនមិនចង់ការពារសមាជិកណាតូ ពីការវាយប្រហារនាពេលអនាគតដោយរុស្ស៊ី ទេ ប្រសិនបើការរួមចំណែករបស់ប្រទេសទាំងនោះចំពោះសម្ព័ន្ធយោធាការពារជាតិមានភាពយឺតយ៉ាវ។

លោក គ្រីស គ្រីសស្ទី (Chris Christie) អតីតបេក្ខជនប្រធានាធិបតីមកពីគណបក្សសាធារណរដ្ឋបាននិយាយនៅក្នុងបទសម្ភាសន៍ជាមួយកម្មវិធីរបស់ទូរទស្សន៍ NBC ថា «នេះហើយជាមូលហេតុដែលខ្ញុំបាននិយាយជាយូរមកហើយថា លោក ត្រាំ មិនសាកសមនឹងធ្វើជាប្រធានាធិបតីសហរដ្ឋអាមេរិក»។

អតីតអភិបាលរដ្ឋ សៅ ខារ៉ូឡាញណា (South Carolina) លោកស្រី នីកគី ហាលី (Nikki Haley) ដែលជាគូប្រជែងតែមួយគត់របស់លោក ត្រាំ សម្រាប់ការតែងតាំងបេក្ខជនប្រធានាធិបតីពីគណបក្សសាធារណរដ្ឋឆ្នាំ២០២៤ បាននិយាយថា «ការលើកឡើងនោះជារឿងគួរឲ្យហួសចិត្ត ហើយយើងមិននៅខាងរុស្ស៊ីទេ»។

សមាជិកព្រឹទ្ធសភាមកពីគណបក្សសាធារណរដ្ឋ លោក លីនស៊ី ហ្គ្រាហាម (Lindsey Graham) ដែលជាសម្ព័ន្ធមិត្តជិតស្និទ្ធរបស់លោក ត្រាំ បានប្រាប់សារព័ត៌មានរ៉យទ័រនៅក្នុងបទសម្ភាសន៍ខ្លីមួយថាលោកមិនយល់ស្របនឹង «ការលើកឡើងរបស់លោក ត្រាំ ពីការបោះបង់សមាជិកណាតូនេះទេ»៕