ប្រទេសជប៉ុន នឹងផ្តល់ថវិកាចំនួន ១៥,៨ ពាន់លានយេន (ប្រហែល ១០៦ លានដុល្លារអាមេរិក) ដើម្បីជួយអ៊ុយក្រែនដោះស្រាយបញ្ហា បន្ទាប់ពីការលុកលុយរបស់រុស្ស៊ី នៅក្នុងតំបន់សំខាន់ៗចំនួន៧។

ប្រទេសនឹងផ្តល់ថវិកា ដើម្បីជួយអ៊ុយក្រែនកសាងឡើងវិញ និងអភិវឌ្ឍន៍ហេដ្ឋារចនាសម្ព័ន្ធរបស់ខ្លួន និងដើម្បីជួយដល់កិច្ចខិតខំប្រឹងប្រែងដោះមីន។

រដ្ឋាភិបាលជប៉ុន និងអ៊ុយក្រែន ត្រូវបានគេរំពឹងថា នឹងយល់ព្រមលើការកសាងឡើងវិញ ក្រោយសង្គ្រាមរបស់អ៊ុយក្រែន និងចុះហត្ថលេខាលើអនុស្សរណៈចំនួន ១០ស្តីពីកិច្ចសហប្រតិបត្តិការក្នុងអំឡុងពេលសន្និសីទជប៉ុន-អ៊ុយក្រែនស្តីពីការស្តារសេដ្ឋកិច្ចឡើងវិញ។

កាលពីខែមករា ប្រទេសជប៉ុន បានប្រកាសថា ខ្លួននឹងផ្តល់វិភាគទានចំនួន ៣៧លានដុល្លារដល់អង្គការណាតូ ដើម្បីធានាបាននូវជំនួយបន្ថែមសម្រាប់អ៊ុយក្រែន រួមទាំងប្រព័ន្ធចាប់យានដ្រូនផងដែរ។

ទោះយ៉ាងណាក៏ដោយ ជប៉ុនមិនអាចបញ្ជូនជំនួយយោធាដោយផ្ទាល់ទៅអ៊ុយក្រែនបានទេ ដោយសារការរឹតបន្តឹងរដ្ឋធម្មនុញ្ញរបស់ខ្លួន។

សារព័ត៌មាន Kyodo News បានរាយការណ៍ថា វិស័យសំខាន់ៗចំនួន៧នៃកិច្ចសហប្រតិបត្តិការជប៉ុន-អ៊ុយក្រែន ក៏នឹងរួមបញ្ចូលផងដែរនូវការអភិវឌ្ឍវិស័យកសិកម្ម ការកែលម្អស្ថានភាពមនុស្សធម៌ ជីវបច្ចេកវិទ្យា និងឧស្សាហកម្ម បច្ចេកវិទ្យាព័ត៌មាន និងការកែលម្អរដ្ឋាភិបាល និងអនុវត្តវិធានការប្រឆាំងអំពើពុករលួយ។