ទីភ្នាក់ងារព័ត៌មានផ្លូវការរបស់ប៉ាឡេស្ទីន WAFA បានរាយការណ៍ថា ចំនួនអ្នកស្លាប់នៅក្នុងការវាយប្រហារដ៏ខ្លាំងក្លារបស់កងទ័ពអ៊ីស្រាអែលលើទីក្រុង Rafah ភាគខាងត្បូង និងជុំវិញតំបន់ហ្កាហ្សាស្ទ្រីប បានកើនឡើងលើសពី ១០០នាក់ នៅថ្ងៃចន្ទ (ទី១២ ខែកុម្ភៈ) ដោយរាប់រយនាក់បានរងរបួស ក្នុងនោះរួមទាំងស្ត្រី និងកុមារផងដែរ។

សេចក្ដីរាយការណ៍បានឲ្យដឹងថា ការវាយប្រហារតាមអាកាសប្រហែល ៤០លើកលើតំបន់ Rafah នៅព្រឹកព្រលឹមថ្ងៃចន្ទនេះ ត្រូវបានធ្វើឡើងដោយកងទ័ពអ៊ីស្រាអែល ជាមួយនឹងការបាញ់ផ្លោងផ្លូវគោកយ៉ាងខ្លាំងក្លា។ កងទ័ពអ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា ខ្លួនបានធ្វើ «ការវាយប្រហារជាបន្តបន្ទាប់លើគោលដៅភេរវកម្ម» នៅតំបន់ហ្កាហ្សាភាគខាងត្បូង នៅថ្ងៃចន្ទនេះ ប៉ុន្តែមិនបានផ្តល់ព័ត៌មានលម្អិតផ្សេងទៀតនោះទេ។

ក្រសួងសុខាភិបាលដែលមានមូលដ្ឋាននៅតំបន់ហ្កាហ្សា បានប្រាប់ឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃអាទិត្យ (ទី១១ ខែកុម្ភៈ) ថា ចំនួនអ្នកស្លាប់នៃជនជាតិប៉ាឡេស្ទីនពីការវាយប្រហាររបស់អ៊ីស្រាអែលនៅតំបន់ហ្កាហ្សាស្ទ្រីបបានកើនឡើងដល់ ២៨.១៧៦នាក់ហើយ ចាប់តាំងពីថ្ងៃទី៧ ខែតុលា ឆ្នាំ២០២៣ មក ដោយចំនួន ៦៧.៧៨៤នាក់ផ្សេងទៀត បានរងរបួស។

គួរបញ្ជាក់ដែរថា គិតចាប់តាំងពីការចាប់ផ្តើមនៃជម្លោះអ៊ីស្រាអែល និងក្រុមហាម៉ាស នៅតំបន់ហ្កាហ្សា ប្រហែលពាក់កណ្តាលនៃអ្នកស្រុកនៅទីនោះបានភៀសខ្លួនទៅកាន់ទីក្រុង Rafah ដែលនៅជាប់នឹងប្រទេសអេហ្ស៊ីប ដើម្បីស្វែងរកទីកន្លែងសុវត្ថិភាព។ ទីក្រុងព្រំដែនដែលទទួលបានជំនួយស្បៀងអាហារ និងថ្នាំពីបរទេស និងទីភ្នាក់ងារអង្គការសហប្រជាជាតិតាមរយៈច្រកឆ្លងកាត់ Rafah នោះ មានមនុស្សយ៉ាងណែនណាន់តាន់តាប់ ដែលរស់នៅក្នុងតង់នៅលើដីកសិកម្មទំនេរ សាលារៀន និងនៅតាមដងផ្លូវ៕