យុវជនមកពីគ្រួសារក្រីក្រដែលកំពុងសិក្សាជំនាញវិជ្ជាជីវៈ និងបច្ចេកទេស នៅមជ្ឈមណ្ឌល​បណ្តុះ​បណ្តាល​វិជ្ជាជីវៈនិងបច្ចេកទេស ខេត្តស្ទឹងត្រែង បានលើកឡើងថា ការរៀនជំនាញវិជ្ជាជីវៈ និង​បច្ចេក​ទេសរបស់រាជរដ្ឋាភិបាលគឺមានឧបរកណ៍ សម្ភារៈសម្រាប់អនុវត្តផ្ទាល់ និង​វិធី​សាស្រ្ត​ក្នុង​ការ​បង្រៀន​ដ៏​សំបូរបែបនៅក្នុងសាលា ហើយយុវជនពេញចិត្ត និងរីករាយក្នុងការរៀនសូត្រ។

ជាយុវតីនៅខេត្តស្ទឹងត្រែង ព្រាង ផល្លី ដែលជាសិក្ខាកាមកំពុងសិក្សាជំនាញវិជ្ជាជីវៈ និង​បច្ចេក​ទេស​ផ្នែក​សិក្សាជំនាញការដំឡើងប្រព័ន្ធបណ្តាញអគ្គិសនី​ក្នុង​មជ្ឈមណ្ឌល​បណ្តុះ​បណ្តាល​វិជ្ជាជីវៈ​ខេត្តស្ទឹងត្រែងបានលើកឡើងថា៖«ខ្ញុំពេញចិត្តនៃការសិក្សាជំនាញវិជ្ជាជីវៈនេះណាស់ ពី​ព្រោះ​ខ្ញុំ​រៀនអគ្គិសនីចឹង ! ក្នុងសាលាមានការអនុវត្តផ្ទាល់ ខ្ញុំមានការដំឡើងអំពូលផ្ទាល់ ហើយ​ការអនុវត្តផ្ទាល់ទៅលើសម្ភារៈអគ្គិសនីផ្សេងៗទៀតជាច្រើន ជា​ពិសេស​នៅ​សាលា​មាន​សំបូរ​បែប​ណាស់​ទាក់​ទង​ និងសម្ភារៈអគ្គិសនីជាច្រើន»។

យុវជនរូបនេះបន្ថែមថា រៀនរយៈពេលជិត ១ខែ​មក​នេះ​ខ្លួន​បាន​អនុវត្ត​ផ្ទាល់​ទៅ​លើ​ការ​ចូល​រោង​ជាង ជាជាពិសេសបានចូលអនុវត្តផ្នែកតបណ្តាញអគ្គិសនីផងដែរ ដោយមាន​គ្រូ​បង្រៀន​តាម​ចង្អុល​បង្ហាញ​ត្រឹមត្រូវ និងយកចិត្តទុក​ដាក់​ណាស់​បូក​រួមទាំង​ការ​បង្ហាត់​បង្ហាញ​ផ្នែក​ផ្សេងៗ​ទៀត​ជា​ដើម។ 

ដោយឡែកយុវជន យុន វាសនា ជាសិក្ខាកាមសិក្សាផ្នែកដំឡើងប្រព័ន្ធបណ្តាញអគ្គិសនីក្នុងអាគារ មជ្ឈមណ្ឌលបណ្តុះបណ្តាលវិជ្ជាជីវៈខេត្តស្ទឹងត្រែងបបានលើកឡើងថា៖«ខ្ញុំពេញចិត្តណាស់ក្នុងការ​រៀន​ជំនាញពីព្រោះខ្ញុំរៀនជំនាញអគ្គិសនីចឹង នៅក្នុងថ្នាក់មានបន្ទប់អនុវត្តពិតៗ បង្ហាញ​កម្ម​វិធី​របស់​វាបានជាក់ស្តែងតែម្តង ដែលកត្តា​ទាំង​នេះ​ហើយ​ដែល​អាច​ទាក់​ទាញ​ចំណាប់​អារម្មណ៍​ខ្ញុំ​ឱ្យ​ចឹង​សិក្សា​ដូច្នេះដែរ»។

យុវជនរូបនេះបន្ថែមថារៀនចប់វគ្គបណ្តុះបណ្តាលជំនាញវិជ្ជាជីវៈចំនួន៤ខែ ខ្លួន​សង្ឃឹម​យ៉ាង​មុត​មាំ​ថា​នឹងអាចមានជំនាញមួយច្បាស់លាស់ មានការងារធ្វើមួយល្អ មានប្រាក់ចំណូលសមរម្យ អាច​ស្រោច​ស្រង់​ជីវភាពគ្រួសារបានប្រសើជាពេលបច្ចុប្បន្ន។ ខ្លួន​អរគុ​ណ​រាជ​រដ្ឋាភិបាល​ដែល​បាន​ដាក់​ចេញ​នូវ​ការបណ្តុះបណ្តាលជំនាញសម្រាប់យុវជនដោយឥតគិតថ្លៃ ហើយមាន​ប្រាក់​ឧបត្ថម្ភ​សម្រាប់​យុជនមកពីគ្រួសារក្រីក្រ។

សិក្ខាកាមទាំងពីរ បានអំពាវនាវទៅដល់យុវជន​ផ្សេង​ៗ​ទៀត​ឱ្យ​មក​ចុះ​ឈ្មោះចូ​ល​រៀន​វ​គ្គ​បណ្តុះ​បណ្តាល​ជំនាញ​វិជ្ជាជីវៈ និងបច្ចេកទេស១,៥ លាននាក់របស់រាជ​រដ្ឋាភិបាល​ដើម្បី​ធានា​ថា​ខ្លួន​ឯង​អាច​មាន​ជំនាញមួយច្បាសលាស់ អាចរកការងារបានធ្វើបន្ទាប់ពីរៀនរយៈពេលខ្លី៕