ក្រុមអ្នករៀបចំ បាននិយាយថា និស្សិត និងសកម្មជនប្រទេសឥណ្ឌូនេស៊ីរាប់រយនាក់ ធ្វើបាតុកម្ម នៅថ្ងៃចន្ទ ទី ១២ ខែកុម្ភៈនេះ ជុំវិញអ្វីដែលពួកគេមើលឃើញថា ជាការបំពានអំណាចរបស់ ប្រធានាធិបតី លោក Joko Widodo ដើម្បីបំបាក់ទឹកចិត្តអ្នកបោះឆ្នោតនៅក្នុងការបោះឆ្នោតក្នុងសប្តាហ៍នេះ ក្នុងការគាំទ្រអ្នកឈានមុខគេ លោក Prabowo Subianto ។ លោក Jokowi ពុំបានគាំទ្រច្បាស់លាស់នណាម្នាក់ក្នុងចំណោមបេក្ខជនទាំងបីរូប ដែលកំពុងប្រជែងគ្នាដើម្បីជំនួសលោកជាមេដឹកនាំនៃប្រទេសលទ្ធិប្រជាធិបតេយ្យធំបំផុតទីបីរបស់ពិភពលោក នោះទេ។
ប៉ុន្តែ លោក បានបង្ហាញខ្លួនជាសាធារណៈជាមួយ លោក Prabowo ដោយកូនប្រុសច្បងរបស់លោក Jokowi ឈរឈ្មោះជាអនុប្រធានាធិបតី។ ការស្ទង់មតិ កាលពីសប្តាហ៍មុនបានព្យាករណ៍ថាលោក Prabowo អាចទទួលបានសំឡេងឆ្នោតច្រើនជាង ៥០ភាគរយនៅថ្ងៃពុធ ដែលអនុញ្ញាតឱ្យលោកឈ្នះក្នុងជុំតែមួយ។ គូប្រជែង លោក អានីស បាស្វេដាន (Anies Baswedan) និងលោក ហ្គានចា ប្រាណូវ៉ូ (Ganjar Pranowo) ត្រូវបានគេមើលឃើញយ៉ាងតិច២០ពិន្ទុ តាមពីក្រោយ។ អ្នកបោះឆ្នោតមួយចំនួន បានលើកយកបញ្ហាកង្វះអព្យាក្រឹតភាពរបស់លោក Jokowi ដោយនិយាយថា វាធ្វើឱ្យខូចលទ្ធិប្រជាធិបតេយ្យរបស់ប្រទេសឥណ្ឌូនេស៊ី ដោយការផ្តល់ឱ្យបេក្ខជនម្នាក់ នូវប្រយោជន៍ដ៏អយុត្តិធម៌។
អ្នករៀបចំការតវ៉ានៅក្រុង យ៉ុកយ៉ាកាតា(Yogyakarta)ជាទីក្រុងនៅលើកោះជ្វា បាននិយាយនៅលើ បណ្តាញ Instagram ថា ការបំពានសីលធម៌ ដោយលោក Jokowi បង្ហាញថា លោកប្រឆាំងទៅនឹងសំឡេងសាធារណៈជាខ្លាំង។ ការតវ៉ាមួយផ្សេងទៀត ត្រូវបានគ្រោងធ្វើនៅរដ្ឋធានីហ្សាការតា ដោយក្រុមសិទ្ធិមនុស្សមួយចំនួន។ ការិយាល័យប្រធានាធិបតី បានបដិសេធការជ្រៀតជ្រែកផ្នែកនយោបាយធ្វើឡើងដោយលោក Jokowi ។