នាវាមួយគ្រឿង បានរងការវាយប្រហារមីស៊ីលចំនួនពីរគ្រាប់នៅក្នុងច្រកសមុទ្រ Bab el-Mandeb ដ៏សំខាន់ នៅថ្ងៃចន្ទនេះ ដែលជាការវាយប្រហារចុងក្រោយ គេជឿថា ត្រូវបានធ្វើឡើងដោយក្រុមឧទ្ទាម ហ៊ួទីនៅប្រទេសយេម៉ែន។

មជ្ឈមណ្ឌលប្រតិបត្តិការពាណិជ្ជកម្មរបស់កងទ័ពអង់គ្លេស បាននិយាយនៅក្នុងសេចក្តីថ្លែងការណ៍មួយថាគ្មាននរណាម្នាក់ រងរបួសនៅក្នុងការវាយប្រហារនោះទេ ហើយនាវានេះ កំពុងបន្តដំណើររបស់ខ្លួន។

គេពុំដឹងថាតើនាវានោះខូចខាតប៉ុនណានោះទេ។

ក្រុមហ៊ួទីមិនបានអះអាងពីការវាយប្រហារភ្លាមៗនោះទេ ប៉ុន្តែជាញឹកញាប់ក្រុមឧទ្ទាមនេះ ត្រូវចំណាយពេលជាច្រើនម៉ោង ដើម្បីទទួលស្គាល់ការវាយប្រហាររបស់ពួកគេ។

ក្រុមឧទ្ទាមបាននិងកំពុងវាយប្រហារនាវានៅសមុទ្រក្រហម និងឈូងសមុទ្រ Aden ចាប់តាំងពីខែវិច្ឆិកា ជុំវិញសង្គ្រាមរបស់អ៊ីស្រាអែលលើក្រុមហាម៉ាស នៅតំបន់ហ្កាហ្សាស្ទ្រីប។ វាបានរំខានដល់ការដឹកជញ្ជូនទំនិញតាមផ្លូវទឹក និងច្រកសមុទ្រ Bab el-Mandeb ដែលតភ្ជាប់ពួកវានោះ។