ក្រុមហ៊ុន Google បានសន្យាផ្តល់ប្រាក់ចំនួន ២៥លានអឺរ៉ូ (ជិត ២៧លានដុល្លារអាមេរិក) ដើម្បីជួយដល់ប្រជាជននៅតំបន់អឺរ៉ុបរៀនប្រើបញ្ញាសិប្បនិម្មិត (AI)។

ដោយប្រកាសពីការផ្តល់មូលនិធិ នៅថ្ងៃចន្ទ (ទី១២ ខែកុម្ភៈ) នេះ ក្រុមហ៊ុនបច្ចេកវិទ្យាយក្សមួយនេះបានឲ្យដឹងថា ខ្លួនបានចាប់ផ្ដើមបើកនូវកម្មវិធី សម្រាប់បណ្ដាសហគ្រាសសង្គម និងអង្គការមិនរកប្រាក់កម្រៃដែលអាចជួយទៅដល់អ្នក ដែលនឹងអាចទទួលបានអត្ថប្រយោជន៍ពីការបណ្តុះបណ្តាលនេះ។

ក្រុមហ៊ុនក៏នឹងដំណើរការជាបន្តបន្ទាប់ផងដែរនូវ «សហមគមន៍សហគ្រិន" ដើម្បីជួយដល់ក្រុមហ៊ុនប្រើប្រាស់ AI ធ្វើឲ្យក្រុមហ៊ុនរបស់ពួកគេរីកចម្រើន និងបានពង្រីកវគ្គបណ្តុះបណ្តាល AI តាមអ៊ីនធឺណិត ដោយឥតគិតថ្លៃរហូតដល់ ១៨ភាសា។

កាលពីខែមករា ក្រុមហ៊ុន Google បានប្រកាសថា ខ្លួននឹងវិនិយោគ ១ពាន់លានដុល្លារអាមេរិក ដើម្បីកសាងមជ្ឈមណ្ឌលទិន្នន័យ នៅខាងក្រៅទីក្រុងឡុងដ្រ៍ ប្រទេសអង់គ្លេស ខណៈដែលក្រុមហ៊ុនចាត់វិធនការដើម្បីបំពេញតាមការកើនឡើងនូវតម្រូវការនៃសេវាកម្មអ៊ីនធឺណិត នៅក្នុងតំបន់។

ក្រុមហ៊ុនដែលគ្រប់គ្រងដោយក្រុមហ៊ុនបច្ចេកវិទ្យាពហុជាតិរបស់សហរដ្ឋអាមេរិក Alphabet បានឲ្យដឹងនៅក្នុងសេចក្តីថ្លែងការណ៍មួយថា មជ្ឈមណ្ឌលទិន្នន័យដែលមានទីតាំងនៅលើផ្ទៃដីទំហំ ១៣ហិកតា ដែលក្រុមហ៊ុន Google បានទិញក្នុងឆ្នាំ២០២០ នឹងមានទីតាំងនៅទីក្រុង Waltham Cross ចម្ងាយប្រហែល ២៥គីឡូម៉ែត្រភាគខាងជើងនៃកណ្តាលទីក្រុងឡុងដ្រ៍៕