ភ្នំពេញ៖គណៈកម្មាធិការជាតិរៀបចំការបោះឆ្នោត អគ្គលេខាធិការដា្ឋន (គ.ជ.ប) ប្រកាសថា រយៈពេល៣ថ្ងៃ នៃយុទ្ធនាការឃោសនាបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ របស់គណបក្សនយោបាយបានប្រព្រឹត្តទៅ ដោយរលូន មានសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងពុំមានបាតុភាពណាមួយ កើតឡើងគួរឱ្យកត់សម្គាល់ឡើយ។

យោងតាមសេចក្តីប្រកាសព័ត៌មានរបស់ គ.ជ.ប ស្ដីពីស្ថានភាពទូទៅថ្ងៃទីបី នៃយុទ្ធនាការឃោសនាបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ តាមរបាយការណ៍ពីគណៈកម្មការរាជធានី ខេត្តរៀបចំការបោះឆ្នោត (គធ.ខប) បានឱ្យដឹងថា នៅថ្ងៃទី១២ ខែកុម្ភៈ ឆ្នាំ២០២៤ ដែលជាថ្ងៃទីបីនៃយុទ្ធនាការឃោសនាបោះឆ្នោតរបស់គណបក្ស នយោបាយក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ពុំមានការហែក្បួន ឃោសនាបោះឆ្នោតទេ ប៉ុន្តែសកម្មភាពឃោសនាផ្សេងទៀត ត្រូវបានធ្វើឡើងជាធម្មតានៅថ្ងៃនេះ។ តាមការកត់សម្គាល់៖

គ.ជ.ប បញ្ជាក់ថា គណបក្សប្រជាជនកម្ពុជា បានធ្វើសកម្មភាពឃោសនានៅស្ទើរតែគ្រប់រាជធានី ខេត្ត លើកលែងតែខេត្តព្រះសីហនុ ដែលភាគច្រើនជាការជួបប្រជុំ និងចាក់មេក្រូផ្សព្វផ្សាយ នៅទីស្នាក់ការគណបក្ស រួមទាំងមានសកម្មភាពចុះជួបអ្នកបោះឆ្នោត បង្រៀនគូស សន្លឹកឆ្នោត និងចែកខិត្តបណ្ណផងដែរ។

ចំណែក គណបក្ស ឆន្ទៈខ្មែរ មានសកម្មភាពជួបប្រជុំនៅខេត្តកណ្តាល នៃភូមិភាគទី៣ និងបាន ចាក់មេក្រូផ្សព្វផ្សាយ ចែកខិត្តបណ្ណ និងជួបប្រជុំនៅខេត្តព្រៃវែង នៃភូមិភាគទី៦។ រីឯគណបក្ស កម្លាំងជាតិ បានធ្វើសកម្មភាពជួបប្រជុំនៅខេត្តកំពង់ធំនៃភូមិភាគទី៨។ ចំពោះ គណបក្សហ៊្វុនស៊ិនប៉ិចពុំបានធ្វើសកម្មភាពឃោសនាបោះឆ្នោតនៅថ្ងៃនេះទេ។

គ.ជ.ប បញ្ជាក់ថា ជារួមដំណើរការឃោសនាបោះឆ្នោតរបស់គណបក្សនយោបាយនៅថ្ងៃទីបីនេះបានប្រព្រឹត្តទៅ ដោយរលូនមានសន្តិសុខ សុវត្ថិភាព សណ្ដាប់ធ្នាប់ល្អ គ្មានអំពើហិង្សា និងពុំមានបាតុភាពណាមួយ កើតឡើងគួរឱ្យកត់សម្គាល់ឡើយ។

សូមជម្រាបថា ការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤មានរយៈពេល១៤ ថ្ងៃ ចាប់ពីថ្ងៃទី១០ ដល់ថ្ងៃទី២៣ ខែកុម្ភៈ ឆ្នាំ២០២៤៕ ដោយ ៖ ដារា