អនុមន្ត្រីក្រសួងកសិកម្ម លោក Michal Kolodziejczak បាននិយាយ នៅថ្ងៃចន្ទ (ទី១២ ខែកុម្ភៈ) នេះថា ប្រទេសប៉ូឡូញគ្រោង នឹងចាប់ផ្តើមការត្រួតពិនិត្យគុណភាពលើការដឹកជញ្ជូនគ្រាប់ធញ្ញជាតិទាំងអស់ពីប្រទេសអ៊ុយក្រែន ខណៈដែលកសិករប៉ូឡូញបន្តការតវ៉ាទូទាំងប្រទេសប្រឆាំងនឹងគោលនយោបាយរបស់សហភាពអឺរ៉ុប ក្នុងនោះរួមទាំងការអនុញ្ញាតឲ្យមានការនាំចូលគ្រាប់ធញ្ញជាតិតម្លៃថោកពីអ៊ុយក្រែនផងដែរ។

គួរបញ្ជាក់ថា កសិករបានចាប់ផ្តើមបិទផ្លូវ និងច្រកព្រំដែនជាមួយអ៊ុយក្រែន កាលពីថ្ងៃសុក្រ (ទី៩ ខែកុម្ភៈ) ដោយចាប់ផ្តើមធ្វើកូដកម្មដ៏ធំរយៈពេល ១ខែ ដើម្បីតវ៉ាប្រឆាំងនឹងគោលនយោបាយរបស់សហភាពអឺរ៉ុប និងកង្វះវិធានការរបស់រដ្ឋាភិបាល ក្នុងការការពារជីវភាពរស់នៅរបស់ពួកគេ។

តំណាងរាស្ត្ររបស់រដ្ឋាភិបាលថ្មីដែលគាំទ្រអឺរ៉ុបរបស់ប៉ូឡូញ បាននិយាយថា ពួកគេយល់ពីបញ្ហាប្រឈមដែលកសិករកំពុងជួបប្រទះ ហើយជំនួយសម្រាប់អ៊ុយក្រែនក្នុងការប្រយុទ្ធប្រឆាំងនឹងការលុកលុយរបស់រុស្ស៊ី មិនអាចកើតមានដោយសារញើសឈាមរបស់កសិករប៉ូឡូញនោះទេ។

លោក Kolodziejczak បានប្រាប់ទីភ្នាក់ងារសារព័ត៌មានរដ្ឋ PAP ថា៖ «ថ្ងៃនេះ ខ្ញុំនឹងស្នើសុំថា ការដឹកជញ្ជូនគ្រាប់ធញ្ញជាតិទាំងអស់ដែលត្រូវបាននាំចេញ និងដែលរងទណ្ឌកម្ម ត្រូវបានត្រួតពិនិត្យនៅក្នុងប្រទេសប៉ូឡូញ»។

លោកបានបន្ថែមថា នៅពេលដែលគ្រាប់ធញ្ញជាតិបែបនេះទៅដល់ប្រទេសអាល្លឺម៉ង់ ហើយបន្ទាប់ពីពិនិត្យឃើញថា មានគុណភាពអន់ ឱកាស គឺ៩៩ភាគរយ ដែលគ្រាប់ធញ្ញជាតិនោះវិលត្រឡប់ទទៅកាន់ប៉ូឡូញវិញក្នុងនាមជាគ្រាប់ធញ្ញជាតិអឺរ៉ុប តែមិនមែនទៅអ៊ុយក្រែនវិញទេ»៕