ចំនួនកុមារប៉ាឡេស្ទីនកាន់តែច្រើនឡើងក្នុងតំបន់ហ្កាហ្សា ស្រ្ទីប ដែលបោះបង់ចោលសាលារៀន បានងាកទៅរកលក់ដូរតាមចិញ្ចើមថ្នល់ដើម្បីជួយគ្រួសាររបស់ពួកគេដែលកំពុងរស់នៅជួបទុក្ខលំបាក ស្របពេលដែលជម្លោះរបស់អ៊ីស្រាអែលនៅតែបន្ដអូសបន្លាយ ដូច្នេះវាបានធ្វើអោយមានបន្ទុកហិរញ្ញវត្ថុធ្ងន់ធ្ងរលើគ្រួសារជាច្រើន។

ក្រុងរ៉ាហ្វាត្រូវគេមើលឃើញមានលំហូរអ្នកស្រុកហ្កាហ្សាដែលបាត់បង់ទីជម្រកជាច្រើន ក្រោយពីការវាយប្រហារធ្ងន់ធ្ងររបស់អ៊ីស្រាអែល ជាបន្ដបន្ទាប់មក បានធ្វើអោយក្មេងជាច្រើនឥឡូវនេះ កំពុងលក់បង្អែម និងអាហារសម្រន់ដើម្បីរកប្រាក់ ជួយផ្គត់ផ្គង់ជីវភាព និងរួមចំណែកជួយផ្គត់ផ្គង់ក្រុមគ្រួសាររបស់ពួកគេ។

កុមារម្នាក់ឈ្មោះ អាមៀរ សាតេលី ជាក្មេងម្នាក់ក្នុងចំណោមក្មេងជាច្រើននាក់ ក្នុងក្រុងខាន យូនីស បាននិយាយថា ឥឡូវរូបគេកំពុងលក់បង្អែមដើម្បីរស់ ហើយរូបគេមានអាយុ១៣ឆ្នាំ។ ក្ដីប្រាថ្នារបស់គេគឺចង់ក្លាយជាវេជ្ជបណ្ឌិតនៅពេលអនាគត។ កុមាររូបនេះបន្ដថា អំឡុងពេលថ្ងៃឈប់សម្រាក រូបគេធ្លាប់ទៅហែលទឹក ឬលេងបាល់ ប៉ុន្ដែឥឡូវនេះ ដោយសារសង្រ្គាមនៅទីនេះ រូបគេមិនអាចអាចធ្វើអ្វីបានទេ។